BOCWWB-a inziak lut mi 17,704 awm mek

Labour, Employment, Skill Development and Entrepreneurship (LESDE) minister Lalnghinglova Hmar chuan, Building and Other Constructions Workers Welfare Board (BOCWWB)-ah inziak lut mi 17,704 an awm mek thu leh, inziak lut an tam zawk theih nan huam zau taka hma an lak dawn thu a sawi.

LESDE Minister hian nimin khan Assembly session-ah Champhai North bialtu ZPM member Ginzalala zawhna a chhanna kal zelah, BOCWWB-ah inziak lut mi 17,704 an awm mek thu House a hrilh a, "Inziak lut tihpun kan tum a, online-a registration tih kan tum. District hrang hrangah neih kan tum a, constituency tinah membership drive neih kan tum. Multimedia campaign-te pawh neih kan tum," a ti.

Lalnghinglova Hmar chuan, labour cess tling khawm sumte chu danin a sawi angin BOCWWB-a inziak lutte tan ṭangkai leh hlâwk taka hman a nih thu leh, scheme dang pawh siam belh theih a nih thu a tarlang.

Ginzalala chuan, labour cess tling khawm chu cheng vbc. 80 vel a awm mek nia a hriat thu sawiin, ṭangkai zawka hman theih dan a awm leh awm loh a zawt a; LESDE Minister chuan, "Ṭangkai zawka hman theih dan kan dap. Sum tling khawm hi BOCWWB member-te tan chauha hman theih a ni," a ti al hman ṭangkai zawk theih dan tur an duan zingah medical bill Rs 5,00,000 siam te, insurance Rs 12,00,000 thleng siamte a tel thu a sawi.

Mamit bialtu MNF member H Lalzirliana zawhna chhangin Lalnghinglova chuan, LESDE-in Aizawl bakah, Lunglei, Siaha leh Champhaiahte district office a neih mek thu a sawi bawk.