DC-te'n fimkhur turin mipui chah

Aizawl district bawrhsap Lalhriatpuia, District Disaster Management Authority chairman chuan, tun kar chhungin Mizoram hmun ṭhenkhatah nasa taka ruahsur tura rin a nih avangin fimkhur turin mipui a chah a; thu dik lo leh belhchian dâwl lo thehdarhtute chu hrem an nih tur thu a tarlang.

Bawrhsap chuan, Ministry of Earth Sciences hnuaia Indian Meteorological Centre-in thuchhuah a siam angin tun kar chhungin ruahsur nasa tura rin a nih thu a tarlang a, "Mahni in leh loin thli leh ruah a dàwl theih nan a ṭul anga thawm ṭhat ngai laite thawm ṭhat tur a ni a, in leh a velah leimin hlauhawm a awm a nih chuan silpauline/tarpauline-a khuh hul tur a ni," a ti.

Vawk leh ran dang vulhna thli, leimin siam theite enfiah a, a thli dâwlna leh tui luan chhuahna mumal tak siam tura mipui chahin DC chuan, "Lui leh tui hmuna kalte a theih chinah tih loh hram tur a ni. Thu dik lo leh belhchian dâwl lo thehdarh loh tur a ni a, thehdarh an awm chuan Disaster Management Act, 2005 hnuaiah an chungah action lak a ni ang," a ti a; tui luankawr leh tuichhe paihnate enfiah a, then fai leh thawm ṭhat ngaite siamṭha turin mipui a chah.

Bawrhsap chuan khuarel chhiatna a thlenin District Emergency Operational Centre toll free number - 1077 chu engtik lai pawha biak theih a nih thu te, eng emaw vanga line tlang thei lo a awm a nih pawhin bialtu zonal officer-te hnenah thu thlen theih a nih thute a tarlang bawk.

Lawngtlai bawrhsap Cheemala Siva Gopal Reddy pawhin thuchhuah siamin, ruahsur vanga chhiatna thleng leh harsatna tawkte chu District Emergency Operation Centre phone number - 9862305451/7085918675 leh bialtu zonal officer/incident commander-te eng lai pawha thlen theih reng an nih thu a tarlang.

Hnahthial bawrhsap Rita Lalnunmawii Pachuau chuan, Hnahthial district-a chhiatna thleng palhah a rang thei ang bera district administration phone number 8798762758-ah hriattir turin mi tin a chah bawk.