MSCPCR-in thubuai 43 an ziak lut tawh

Naupang kum 18 hnuai lamte dikna leh chanvo humhalh hna thawk tura din, Mizoram State Commission for Protection of Child Rights (MSCPCR) chuan kum ruk leh thla nga chhungin naupang venhimna dan bawhchhiat vangin thubuai 43 an ziak lut tawh a, thubuai 40 an chingfel tawh.

MSCPCR hi February 2018 khan The Commission for Protection of Child Rights Act, 2005 hnuaiah din a ni a; naupang venhimna dan hrang hrang bawhchhiatna vanga thubuai an ziah luh 43-te chu kum 2018-19 aṭanga kum 2024-25 (August 2024) thlenga an ziah luh a ni. Thubuai 43 zinga 40 chu chingfel tawhin, buaipui mek pathum an la nei.

MSCPCR-in thubuai 43 an ziah luh zinga 23 (53.49%) chu naupang ṭanpui ngai leh dan kalha chete dikna chanvo humhalhna dan, The Juvenile Justice (Care & Protection of Children), Act, 2015 bawhchhiatna a ni a; hursualna chi hrang hrang laka naupangte venhimna leh mipat hmeichhiat thila naupang khawih chingpentute hremna dan, The Protection of Children from Sexual Offences (POCSO) Act, 2012 hnuaia thubuai 12 (27.91%) ziah luh a ni.

Naupang kum 6-14 zawng zawngin zirna an dawn vekna tur dan, The Right of Children to Free and Compulsory Education (RTE) Act, 2009 bawhchhiatna vanga thubuai ziah luh paruk a awm a; hriselna atana hlauhawm thei thila kum 18 hnuai lamte chhawr khapna dan, The Child and Adolescent Labour (Prohibition and Regulation) Act, 1986 leh Child Health hnuaiah thubuai pakhat ve ve ziah luh a ni bawk.