Legislators' Home & Chakma House bulah MZP hruaitute an pung khawm

Borapansury khuaa Chakma nu hoin police pahnih kut an thlaknaa mawh­phurtute thubuai siamsak phûtin MZP-te chu nimin zing khan MLA zinga Chakma pahnih chênna, Tuikhuahtlanga Legis­lators' Home bulah leh Hunthar Venga Chakma House bulah an pung khawm.

MZP chuan thuchhuah siamin, police pahnih kutthlaknaa mawhphurtute thubuai siamsak an nih hma chuan Aizawla Chakma-te páwnchhuah an khap tih an tarlang a, "Chakma-te pawnchhuah khapna zawm a nih leh nih loh enfiah turin tukin (August 21) khan MZP chuan hnatlang a ko a, Chakma House leh Legislator Home kawtah punkhawm a ni," an ti.

MZP hruaitute chuan August 20, Thawhlehni zan khan Home minister K Sapdanga an hmu a, nimin chhun khan an punkhawmna hmunah Home secretary Vanlalmawia, DIG (Northern Range) H Ramthlengliana leh police hotute an duhte an sawipui bawk.

Home department leh police hotute'n MZP duh dan anga hmalak mek a nih thu leh FIR pawh a luh tawh thu an sawi avang te, chhui mek a nih thu leh thubuai siam ngei tum a nih thu an sawi avangin punkhawm chu an titawp rih tih MZP chuan an tarlang bawk.

MZP chuan, Borapansury-a thil thleng chungchanga FIR ziah luh tawh chu chak taka bawhzui tur leh mawhphurtute na taka hrem turin sorkar an ngen a, "Misualte chêt dan hi magisterial enquiry la ngei se kan duh a, misualte rang takin chhui chhuak se, hremna pe ngei rawh se," an ti.