Sangau RD Block-ah buhfai a awm ṭha

Lawngtlaia district civil supply officer (DCSO) Lalrinsanga chuan, August 19-20, 2024 chhung khan Sangau RD Block chhunga FCSCA kudamte a enfiah a; Sangau RD Block huam chhungah buhfai chhêk khâwl a awm ṭha a, mipui tan thlaphanna tur a awm lo.

Lawngtlai DCSO hian Bualpui Ng, Vawmbûk, South Lungpher, Lungtian leh Sangau-te tlawhin, buhfai dinhmun bakah, mipui hnena buhfai sem chhuah dante a enfiah a; a tlawh khuaahte hian khawtlang hruaitute'n FCSCA department-a thlen tur an neihte an lo sawipui a, retailer-te'n an harsatnate an lo thlen bawk.

DCSO-in a tlawh lai hian Sangau kudamah buhfai quintal 2,749.34 awmin, Lungtian kudamah qtl. 259.53 a awm a, kudam pahniha buhfai awm mekte chu fûr ruahtui tlak vanga harsatna eng emaw a awm palh pawha Sangau RD block chhunga mipuite tan hun eng emaw chen tla tura ngaih a ni.

Lawngtlai DCSO hian Vawmbûk leh South Lungphera kudam leh thawktute quarters tur sak mek a en bawk.