Police-in lawng an tichhia, kut an thlâk - Borapansury VC & NGO

Borapansury khaw­tlang hruaitute leh tlawm­ngai pawlte chuan, tun hnaia an khuaa Chakma Mahila Samiti member-te leh Bora­pansury Police Station-a police pahnih inkara kut inthlak a ni chu zahthlak an tih thu leh, police pahnih chuan lawng an tihchhiat bakah, Chakma nu ho kut an thlak avangin buaina a chhuah thu an tarlang.

Borapansury VC-te leh NGO-te thuchhuah tarlan danin, August 19, 2024 tlai dar 5 vel khan Borapansury PS officer-in-charge Clifford MS Hriatzuala leh constable H Zothansanga ten Chawngtea kal nan lirthei (Gypsy) hman tur an zawng a, an hmuh loh hnuah Chawngte thlenga kalna tur lawng (boat) hman tumin lawng neitute an dàwr leh a ni.

Police-te hian lawng chu Rs 10,000-a hman an dil a, lawng neitute'n an lo hnar a; police-te chu thinrimin Thega lui kama lawng zinga pali chu hman theih loh khawpin an tichhia a, an tihchhiat chu Rs 2,00,000 vel hûah an ngai.

Police pahnihte dan tumtu hmeichhiate chu police-te'n kut an lo thlak nghal a; an zinga pakhat chuan Chakma Mahila Samiti member-te a hrilh a, hmeichhiate pung­khawmin, kut inthlakna a thleng zui a ni. "Borapansury-II VCP leh Young Chakma Asso­cia­tion hruaitute'n an ṭhelh a, police-te hian khaw­tlang leh tlawm­ngai pawl hruaitute hriat­­puinain an thil tih chung­­chang sawifiahna (state­ment) ziakin, hming an sign hnan a ni," an ti.

Borapansury VC leh NGO thuchhuaha police pahnihte statement copy tarlan aṭanga a lan danin, Borapansury PS-a OC Clifford MS Hriatzuala leh constable H Zothansanga te hian zu an rui a, lawng an tih chhiat bakah, chhan awm loin mi car chahbi an chhuhsak a ni.

Police pahnih hian mi dang kut an thlak hnuah kut an tawrh ve thu te, lawng an tihchhiat man chu ni sarih chhunga an rulh dawn thu te, buaina chhuakah mawh an phurh thu te, statement chu rilru fim taka an ziah thute an tarlang bawk.

Borapansury VC leh NGO thuchhuahah hian Borapansury-I, Borapansury-II leh Borapansury East VCP te, YCA leh Chakma Mahila Samiti president te, Zonal YCA, Zonal CMS leh Zonal Mizoram Students Union president ṭheuhte'n hming an ziak a ni.