KHAWTHLIR

Kuhva phurh khap

Aizawl district magistrate Lalhriatpuia chuan thupek chhuahin, Aizawl district-ah dan loa kuhva phur lirthei veivâk a awm ṭhin tih hriat a nih avangin BNSS, 2023 Section 163(1)-in thuneihna a pek angin Aizawl district-ah dan loa kuhva leh bungrua lak luh leh phurh khap a nih thu a puang. Thupek bawhchhia chu BNS, 2023 Section 223 hmanga hrem an nih tur thu a tarlang.

Heroin man

Excise & Narcotics department leh Central YMA Kumpuan Committee chuan August 20, Thawhlehni zan dar 11:55 khan Bawngkawna NRSPG Hostel room no. 15-ah heroin gram 197 (hawng 15) an man a, a neitua puh Lalnipuia (29) s/o K Zilua, Republic Veng, tuna Bawngkawna khawsa mek nia inchhál an man bawk. NDPS Act, 1985 tlawhchhanin thubuai ziah luh a ni a, heroin leh a neitu chu nimin khan Special Court (NDPS Act)-ah hruai a ni.

Sangha no sem

Fisheries department chuan August 20, Thawhlehni khan Saitual district-a Làmherh, Vanbawng leh North Khawlêk khuaa sangha khawitute tan sangha no an sem. Fisheries hotute chuan, ruahsur nasa avangin kawngah leimin a awm zeuh zeuh thu leh thil nung sâwngbâwl an nih avangin an duh anga chakin sangha no an sem thei lo tih an tarlang.

Sericulture prog.

Lawngtlai District Sericulture Office chuan nimin khan district sericulture officer Lalrammawia hoin Saikah cluster-ah 'One Week Sericulture Programme' khârna an hmang. District Sericulture Officer chuan, pangang khawitute'n silk (la) an thar zawng zawng Sericulture department-in a lei vek dawn thu a sawi. Saikah cluster-ah hian mi 12-in pangang (eri silkworm) an khawi a ni.