Lirthei pawlte'n NH kawngpui an dang; Buaina leh harsatna lian a thleng rih lo

Kolasib District Truck Owner Asso­ciation (KDTOA), Kola­sib district-a MTA, MTDA leh Kawnpui Town Driver's Asso­­­­cia­­tion (KTDA)-te chuan kawng­pui chhe lutuk thawm ṭhat phût nan nimin chawhma dar 10 aṭang khan tiam chin awm loin Kolasib district-a natio­nal highway kawngpuite an dang a, thil duhawm lo leh har­­sat­na lian thleng a awm lo.

Pawl pali hruaitute hian August 19, 2024 khan Kolasib Press Club-ah thuthar thehdarhtute kâwmin, August 22 aṭangin tiam chin awm loin Kolasib district-a NH kawngpuiah tlan lo tura ngenna an tihchhuah thu an lo puang tawh a; an ngenna mipuiin an zawm leh zawm loh enin nimin khan hmun hrang hrangah an indah a ni.

Kawng dangtu hruaitute hnen aṭanga thu dawn danin, lirthei pawl aiawhte leh pawl dang aiawhte chu nimin khan Lungdai, Kawnpui, Bualpui, Kolasib, Rengtekawn, Vairengte leh Sai­phaiahte an duty a, lirthei tlan a awm leh awm loh an endik.

Vanglaini zawhna chhangin lirthei pawl hruaitute chuan, an ngenna chu mipuiin an zawm ṭhat thu sawiin, "Kawng laka tangkhang tlem tih loh chu tlan an awm lo. Cachar lama lirthei neitu pawlte kan hrilh lâwk avangin rawn tlân chho an awm lo," an ti.

Lirthei pawl hruaitute chuan, an hmalakna chu NGO dangte pawhin an thlâwp ṭhat thu sawiin, Vairengte-ah lirthei pawl zawng zawngin an thlâwp a, Bualpuiah NGO dangte'n an duty-pui a, Saiphaiah pawh pawl dangte nen an duty thu an sawi.

Sorkara thuneitute nen indawrna thar a awm leh awm loh zawhna chhangin, "Vawiin (August 22) chhun dar 12 vel khan DC leh MJA-te an lo kal kual a, 'Kawng siamtute'n hna an thawh leh thawh loh kan endik phawt ang a, kan indawr zel dawn nia,' an ti a. Tunah chuan thu dang kan la nei rih lo a, kan hmalakna tihtawp tumna lam a la awm lo," an ti.

KDTOA, MTA, MTDA leh KTDA-te hian PWD Minister leh Kolasib bialtu MLA (Deputy Speaker)-te'n kawngpui chhiate chei ṭha thuai tura NHIDCL leh contractor-te an ngenna pawh zahloah NHIDCL leh an hnuaia contractor-te an puh a; kawng siamtu contractor-te chu August 2024 ral hma ngeiin Kolasib district aṭanga inla chhuak tur leh, an aiawh contractor hna thawk thei ngei tur dah thuai turin Mizoram sorkar an phût thu an lo puang tawh a ni.

Lirthei pawlte'n lungawi lohna an lantir chungchangah Kolasib bawrhsap Robert C Lalhmangaiha chuan nimin khan a pisaah Kolasib-a MJA member-te a kâwm a, Kolasib district-a lirthei enkawltute'n kawngpui ṭha an phût vanga lirthei tlân an remtih loh chung-changa sorkar hmalakna a hrilhfiah.

Kolasib DC chuan an thil tum puanga press conference an neih ní, August 19 tlaiah kawng siamtute a ko khawm nghal thu leh kawng chhe zualpui hnawh tura a hriattir thu a sawi a, "Mizoram PWD Highway Division lam chuan meeting thu bawhzui hian kawng khuar chhe zual lai an hnawh ṭan nghal a, NHIDCL pawhin an hnuaia contractor-te chu ni 15 chhung hun pein, kawng chhe zual lai hnawh mâm turin an hriattir," a ti.

Robert C Lalhmangaiha chuan, lirthei enkawltute chu August 21, Nilaini zanah a kâwm a, lirthei tlân lo tura hma an lakna chu kaltlangpui lo turin a ngen tih a sawi.

Lirthei enkawltute'n an tum chu kaltlangpui an tum avangin thil duhawm lo a thlen loh nan hma an la tih sawiin Bawrhsap chuan, "DC leh district magistrate ka nihna angin law and order kenkawh ngaihna thil duhawm lo thleng lo se tih chu kan duh dan a ni a, mipui tan harsatna thleng lo se kan duh a, hei hi sorkar thuneitute din chhan leh ngaihtuah ber tur a ni," a ti.

Vairengte-Aizawl NH kawng chungchang hi Serlui bialtu MLA Lalrinsanga Ralte chuan August 20-21, 2024 chhunga Assembly session-ah a zawt a, PWD minister Vanlalhlana'n ziakin a chháng. Minister chuan, "Vairengte-Aizawl kawngah PWD hian Bilkhawthlir-Kolasib leh Kawnpui-Khamrangte kan enkawl mek a, heng kawngte hi a theih ang anga siamṭhat mek niin, siamṭhat chhunzawm zel tum a ni," a ti.