Report chinah aikal la awm tawh lo; Sorkar sikulah aikal lâk titawp tawh

DPAR minister K Sapdanga chuan, sorkarin aikal la tihtawp a tumnaa department hrang hrang aṭanga compliance report an dawn tawh chinah aikal la/chhawr an awm hriat a nih loh thu a tarlang a; School Education minister Dr Vanlalthlana chuan, sorkar sikulah aikal lak tihtawp a nih tawh thu a tarlang bawk.

Assembly session neih zawh taka Lawngtlai West bialtu INC member C Ngunlianchunga zawhna ziaka a chhannaah K Sapdanga chuan, aikal lâk tihtawp tuma hmalak zel a nih thu a tarlang a; aikal la awmna department a la awm leh awm loh zawhna chhangin, "Sorkarin aikal late ni 19.7.2024 ral hmaa zawm vek turin hriattirna a chhuah a, he thuchhuah hi an zawm ngei a ni tih compliance report ni 3.8.2024 ral hmaa thehlut turin department zawng zawng hriattir an ni," a ti a; compliance report chu zir chian mek a nih thu a tarlang.

DPAR Minister chuan, aikal la ruai chhunzawm an awm leh awm loh chu department-in compliance report an thehluh aṭanga zir chian mek a nih thu tarlangin, "Compliance report dawn tawh chinah aikal la/chhawr an awm hriat a ni lo," a ti.

MNF member K Laldawng­liana'n hriatthiamna hmanga aikal la an la awm tho em tih a zawhna chu ziaka chhangin K Sapdanga chuan, "Aikal lak hi eng sorkar dan mahin a phal loh avangin hriatthiamna hmanga kaltir theih an ni lo a, hriatthiamna hmanga aikal lak/chhawr hi thil theih a ni lo," a ti bawk.

Education minister Dr Vanlalthlana chuan August 20 khan Mamit bialtu MNF member H Lalzirliana zawhna ziaka chhángin, "Zirtirtu aikal ruaite hian an aikal rawih zawng zawng hi sorkar thu angin an titawp vek tawh a, natna khirh tak tak tuar mek, anmahni post-a awm thei lote an awm a, hengte hian aikal la tawh loin, an leave neih ang angte an lak chhun­zawm a ni," a ti.

Hetih lai hian C Ngunlianchunga'n Lai Autonomous District Council (LADC) huam chhunga Samagra Shiksha zirtirtu zingah aikal la an awm leh awm loh a zawhna a chhannaah Dr Vanlalthlana chuan, Samgara Shiksha zirtirtu zingah aikal la an la awm thu a tarlang.