Lokayukta leh MPSC member thar la lut

Mizoram Lokayukta member atana ruat thar Joel Joseph Denga leh Mizoram Public Service Commission member atana ruat thar K Lalhmingliana te chu nimin khan Governor Dr Hari Babu Kambhampati-a'n rinawmna thu tiamtirin a la lut.

Lak luhna inkhawm hi chief secretary Dr Renu Sharma-i'n a kaihruai a; Governor chuan Lokayukta member atan Mizoram Judicial Service-a aṭanga châwl tawh Joel Joseph Denga leh MPSC member atan Mizoram Civil Service aṭanga châwl hlim K Lalhmingliana te rinawmna thu a tiamtir a ni.

Swearing-in ceremony-ah hian chief minister Lalduhoma, Assembly speaker Lalbiakzama, minister-te leh MLA-te bakah, mi pawimawh dangte an tel.

Lokayukta Judicial member thar Joel Joseph Denga hi June 10, 1964-ah piangin, thiamna lamah BA, LLB a ni a, kum 1998 aṭangin ukil hna a thawk a, May 24, 2011-ah MJS-ah a lut. Lokayukta judicial member atana ruat a nih lai hian Aizawl District and Session Judge hna a chelh mek a ni.

MPSC member thar K Lalhmingliana chu February 6, 1966-ah piangin, thiamna lamah B.Sc. a ni a, April 1, 1998-ah MCS-ah a lut. Mizoram sorkarah additional secretary a thleng a; AMC commissioner a nih mek laiin MPSC member atan ruat a ni a, sorkar hna a chawlhsan a ni.