Ráltlânte tan nuai 800 hmu tawh

Home minister K Sapdanga chuan, Mizorama ráltlânte ṭanpui nan sorkar laipui aṭangin Mizoram sorkar hmasa hunah cheng nuai 300 hmuh a nih thu leh tun sorkarah nuai 500 hmuh a nih tawh thu a tarlang a; a vaiin nuai 800 a ni.

Assembly session neih zawh takah August 20, 2024 khan Home Minister chuan East Tuipui bialtu MNF member Ramthanmawia zawhna chhángin, Mizorama lut ráltlânte ṭanpui nan sorkar laipui aṭangin MNF sorkar laiin cheng nuai 300 dawn a nih thu a tarlang a, "Tun sorkar tharah hian central sorkar aṭangin nuai 500 dawn a ni tawh," a ti.

Home Minister chuan, sorkar hmasa huna sum hmuh cheng nuai 300 hmanna chi hrang hrang a tarlang a; tun sorkara hmuh cheng nuai 500 erawh chu hman a la ni lo a, ráltlânte mamawh atan hman ṭangkai a nih dawn thu a tarlang.