Congress party-in lungawi lohna lantir

India rama Congress party chuan Adani Megascam chhui tur Joint Parliamentary Committee ruat turin prime minister Narendra Modi sorkar phût nan nimin khan hmun hrang hrangah lungawi lohna an lantir a; Mizoram Pradesh Congress Committee (MPCC) pawhin Congress Bhavan-ah hun an hmang.

MPCC president Lal Thanzara chuan, August 13, 2024 khan All India Congress Committee Headquarters, New Delhi-ah AICC president Mallikarjun Kharge, Lok Sabha-a opposition leader Rahul Gandhi, AICC general secretary-te leh state hrang hranga Congress president-te ṭhutkhawmah August 22-ah Enforcement Directorate pisa kawtah leh hmun hrang hrangah lungawi lohna lantir rêl a nih thu a sawi.

Lal Thanzara chuan, Narendra Modi sorkarin Adani company hmangin nasa takin mipui sum an tihchingpen thu te, stock market-a sum invest-tu India mipui maktaduai têlte sum vaibelchhe sing tam tak hlohtir a nih chungchang chhuitu Security Exchange Board of India (SEBI) Chairman chu thil dik loa inhnamhnawih ngeia a lan avangin chhui ṭhat an phût thute a sawi a, "Adani megascam chhui tura Joint Parliamentary Commitee ruat turin Modi sorkar kan phût a ni," a ti.

MPCC President chuan, India rama hnam hnufual zawkte'n an chanvo dik tak an chan theih nan caste census neih thuai an phût thu te, India Danpui (Constitution) zah leh zawm a nih a, mipuite'n chanvo leh zalenna an neihte humhim a nih ngei nan a taka hma la turin sorkar laipui an phût thute a sawi bawk.

Lungawi loh lantirnaah hian MPCC senior vice president Lalnunmawia Chuaungo-in SEBI chairperson Madhabi Puri Buch leh a pasalte chu Adani group-in stock manipulation an kalpui danah inhnamhnawih ngeia hriat an nih dan te, SEBI-in Adani stock market manipulation chungchang an chhui danah thil fel lo a awma a lan dante a sawifiah a ni.