Sorkar kum 3 kal ta chhungin vawk thi leh suat 72,533 a ni

Animal Husbandry & Veterinary minister C Lalsawivunga chuan, sorkar kum thum kal ta, 2021-22 - 2023-24 chhungin African Swine Fever (ASF) kaihhnawihah vawk 72,533 a thi a, chu'ngte chu cheng vbc. 560.23 hua chhût a nih thu leh, kumin 2024 (calendar year) bikah August 15 thlengin vawk 27,843 a thih tawh thu a tarlang.

Assembly session neih zawh takah August 20 khan AH&Vety Minister chuan Aizawl West-III bialtu ZPM member zawhna chhangin, ASF vanga Mizorama vawk thi zat leh vawk suat zat a tarlang a; kum thum kal ta chhungin ASF vangin vawk 47,351 a thi a, vawk 25,182 suat a ni bawk a, a vaiin vawk 72,533 a nih thu a tarlang a ni.

AH&Vety Minister chuan, kumin 2024 (calendar year) bikah January-August 15 thleng khan ASF kaihhnawiha thi 9,866 leh suat 17,977 a awm a, a vaiin 27,843 a nih thu leh, chu'ng vawk thite hlut zawng (sum hloh) zat chu vbc. 239.45-a chhût a nih thu a tarlang.

C Lalsawivunga chuan, kum 2021-a ASF vanga vawk suat neitute tan zangnadawmna pek tur sorkar laipui aṭangin cheng nuai 584.97 leh state sorkar aṭangin nuai 384.97, a vaiin cheng nuai 1,169.94 hmuh a nih thu a tarlang a, "Hengte hi chhungkaw 2,4,88 hnenah sem zawh tawh a ni," a ti.

Vety Minister chuan, kum 2022 chhunga ASF vanga vawk suat neitute hnena zangnadawmna pek tur sum nuai 1,063.26 dil a nih thu tarlangin, "Govt of India share 25% i.e. nuai 131.66 leh state matching share nuai 131.66, a vaiin nuai 263.32 hmuh tawh a ni a, pek chhuah theih thuai beisei a ni," a ti a; kum 2023 chhunga ASF vanga vawk suatte tana Rs 74,70,800 dil pawh National Steering Committee-in a pawm tawh thu a tarlang.