Assembly dan pawm tharah ZPM lawm

ZPM party chuan thuchhuah siamin, 9th Mizoram State Assembly session vawi thumnaah ṭhalai, mimal leh company-te tana guarantor-a sorkar a ṭan theihna tur The Mizoram Ceiling on Government Guarantees (Amendment) Bill, 2024 pawm a ni chu ropui an tih thu an tarlang.

ZPM chuan, "Mizoram ṭhalaite'n sumdawnna leh mahni kutkawih eizawnna kawnga ke an pên theihna tura loan pûk duhte tana guarantor-a sorkar a ṭan theihna tur dan, The Mizoram Ceiling on Government Guarantees (Amendment) Bill, 2024 lungrual taka pass a ni hi a ropui kan ti. ZPM a sorkar hnu lawka a intiamna leh a auhla tihhlawhtlina a awm hi a thlamuanthlak kan ti a, mahni thutiam leh auhlaa ding CM kan nei hi lawmawm kan ti," an ti.

The Mizoram Ceiling on Government Guarantees (Amendment) Bill chu Mizoram sorkar flagship programme, Handholding Policy a hlawhtlin theihna tura kawng pawimawh tak a nih thu sawiin ZPM chuan, "Cheng nuai 50 chin loan-ah guarantor-a sorkar ṭan te, interest free loan pek chhuah leh special package loan pekna turahte he dan hian kawng a rawn hawng a ni," an ti a, dan siamṭhat chu mi rethei thleng a nih thu an sawi.

ZPM chuan, The Mizoram Prisons and Correctional Services Bill, 2024 pawm a ni pawh lawmawm an tih thu tarlangin, "Mizoramah dan rorelna (rule of law) a awm theihna tura rahbi pawimawh takah kan ngai a, kan ram tan malsawmna thlentu a nih ngei kan ring," an ti.

The Mizoram Prisons and Correctional Services Bill-ah tunlai technology mila mi tángte enkawl dan tur te, tángte an tlanbo pawha chin hriat theihna tur khawl tracking device vuahte a awm thu sawiin ZPM chuan, "Heng bakah hian mi tángte ṭhen hran tur niin, hei hian kum naupang zawk táng mekte'n an mi kawmte aṭanga sual dang an zir belh emaw, inkaihhruaina ṭha lo zawk an dawn belh turte nasa takin a vên dawn avangin lung-in chu inzirtirna hmun ṭha takah a chang tawh dawn a ni," a ti bawk.