NH-54 kawngpui siam mek enfiah

Serchhip DC Paul L Khuma, Competent Authority for Land Acquisition (CALA) ni bawk chuan nimin khan Bungtlang, Keiṭum leh Sailiamkawna NH-54 kawngpuiin a paltlang hmunte a tlawh a; NH-a mimal leh pawlin harsatna an neihte bakah, tun hnai ruahsur nasa vanga hnathawh khaihlak leh harsatnate a enfiah.

Bawrhsap hian NH-54 kawng siam meka Serchhip district chhung - Bungtlang, Keiṭum leh Serchhip Sailiamkawn inkarah kawng la siam zawh lohna hmun 13 a tlawh a; kawng siam tikhaihlak zawnga awmte leh zangnadawmna dawng tawh zinga an in la ṭhiat lote chu sorkar tha chakna hmanga tihluihnaa nawr chhiatsak ngai lo a, hun pek an nih chhunga ṭhiat turin a chah.

NH-54 kawngpui zauh hna hi National Highway Infrastructure Development Limited hnuaia contractor KRAM Infracon-in an thawk a ni.