KHAWTHLIR

SBM(G) palai ruat

Swachh Bharat Mission (Gramin) mission director H Duhkima chuan SBM (Gramin) Mizoram brand ambassador atan PC Lalnunzira (Zira PC) a ruat. Palai atana inruatna hi nimin khan PHE department-a Project Management Unit pisaah neih a ni.

END-in heroin man

Mamita Excise & Narcotics enforcement staff-te chuan nimin khan Mamit maxicab enkawltute hnen aṭanga thu an dawn bawhzuiin Mamitah heroin gram 1.680 an man.

Hmalakna thlirho

Mamit District Review Committee chu an chairman Jacob Lalawmpuia, DC hoin nimin khan Rural Infrastructure Development Fund leh Warehousing Infras­tructure Fund - NABARD hnuaia project kal mekte an thlirho a, hmalak zel dan turte an sawiho bawk.

Ruihhlo ngaite ṭanpui dan tur rel

Khawzawl bawrhsap K Vanlalṭhiana hoin nimin khan DC meeting hall-ah sorkar hotute leh tlawmngai pawl aiawhte'n Narco Coordination Centre (NCORD) chungchanga hmalakna, harsatna leh mamawhte an sawiho. NCORD hi ruihhlo ngaite ṭanpui leh ruihhlo laka fimkhur tura mipui zirtir nana duan a ni a, awareness siam nan social media-a ṭan lak leh ruihhlo ngaite ṭanpui theih dante an rel a ni.

Ṭawngṭaipui turin ngen

Orissa for Christ chuan August 23-26, 2024 chhung hian RSS leh Hindu firfiak pawlte'n kum 2007-2008 a Kristiante an tihduh­dah tawhna hmun, Kandhamal district-ah kawng­zawh an tum avangin Kristiante an tlan­chhia niin an tarlang a; Orissa-a Kristiante ṭawng­ṭaipui turin kohhran, pawl leh mi tin an ngen.

Mi 23 vailiam

Delhi-a Japan ṭawng zir tur Mizo 23-te chu nimin khan Labour, Employment, Skill Development and Entrepreneurship director Angela Zothanpuii'n LESDE auditorium aṭangin a vailiam. Mi 23-te hian thla 9 chhung Delhi-ah Japanese an zir dawn a, training zawhah Japan lama employer thawhpuite kaltlangin Japan-ah hna thawk turin an kal dawn a ni.