NLUP-ah thawk tha lote vangin Nuai 168 sên thlawn a ni: CM

Nimin khan Vanpa Hall-ah chief minister Lal Thanhawla hoin NLUP tuaithar lehna hun, 'NLUP Revitalization Programme' hman a ni. Chief Minister chuan, NLUP dawngtu hna thawk ṭha lote vangin cheng nuai 168 sên thlawn a nih thu a sawi.

NLUP Revitalization Prog­ramme hi State Planning Board vice chairman H Liansailova'n a kaihruai a; CM Lal Thanhawla chuan, "NLUP first phase leh second phase chhungin a dawngtu thlan chhuah mi 6,000 chuangin an tihṭhat duh loh vangin cheng nuai 168 sên thlawn a ni a, a vanduaithlakin a pawi hle. Pek zawm tlak loh leh chhuhsak ngai nihte hi a mualphothlak a ni," a ti a; NLUP dawngtu kalkhawmte chu Pathianin retheihna ata NLUP hmanga khaichhuah a duh tih hre turin a chah.

Chief Minister chuan, NLUP chhunzawmna turah kawng tam taka hma thar lak tum a nih avangin intuaithar lehna nen kalphung thara kal a ni dawn tih a sawi a, "NLUP sawichhetute leh dodaltute'n hêkna belhchian dâwl loin Central sorkarah min hêk mah se, thu dik hrilhfiah an nih hnuah a ṭhat lohna an hmuh loh avangin chhunzawmna tur sum kan dil aia tam min rawn pe a ni. Hêkna avang hian mi tam takin an rawn ngaihven phah a, thil awm dan hrilhfiah an nih chuan NLUP hêk a ni chu mak an ti hle," a ti.

NLUP dawngtute'n an thar chhuahte hralhna turin leh hamṭhatna an hmuh theihna atan Market Infrastructure Development ngaihtuah mek a ni tih sawiin Lal Thanhawla chuan, "Regulate market te, wholesale market te, terminal market-te leh retail market-te ngaihtuah mek a ni," a ti a; thlai sawngbawlna lamah pawh mamawh ang zela hmalak tum a nih thu a sawi.

Chief Minister hian NLUP dawng tura hnathawk thei awm lo chhungkua, mahse tanpui ngai si te hnena pek ṭhin Chief Minister Special Scheme aṭangin nimin khan mi pahnih hnenah Rs. 20,000 ve ve a hlan.

Agriculture minister R Lal­zir­liana pawhin thu sawiin, NLUP vangin tlangram lo neih a tlahniam niin a sawi a, "NLUP-in kum nga chhunga hmasawnna a hmuh hi hmasawnna ngêlnghet a ni. Sum hmuh tur pawh hmuh kim a ni tawh. Hlawhtlinna 100%-in hmu lo mah ila, mi harsa zawkte hnena ṭanpuina kan pe hi a lawmawm hrim hrim. NLUP hi malsawmna thuah tam tak thlentu a ni," a ti.

NLUP Revitalization Prog­ramme hi Nilaini leh nimin khan district khawpui hrang hrangah pawh hman a ni a, minister-te'n an hmanpui a ni.

Sorkar thuchhuah tarlan danin, NLUP kalpui a nih atangin kum 2013-14 chhungin tlangram lo neih 20.75%-in a tlahniam a, tlangram loneitu chhungkaw (jhumia family) pawh 14%-in an tlahniam a ni.

Kum 2013-14 chhungin Mizoram buh thar zatah NLUP-in 9% a thawh a, leilet awm zawng zawngah NLUP-in 20.76% a thawh bawk.