Tripura aṭanga Mizorama Bru lak lêtte free ration tihpun a ni

Mizoram Bru raltlan Tripura transit camp-a awm, Mizorama kîrte chhawmdawlna zinga mi, a thlawna ei tur pek hun chhung chu tihpun a ni. Hetih lai hian, Bru lak let hna chhunzawm turin ruahmanna siam tawh a ni a, sorkar laipuiin sum a pek chhuah leh hunah chhunzawm tum a ni.

Vanglaini palai zawh­na chhanga Home department additional secretary Lalbiakzama sawi danin, Mizorama Bru lêtte chu kum hnih chhung a thlawnin ei tur pek an ni dawn a; hei hi Bru pawlte'n an phût, Ministry of Home Affairs (MHA)-in tun hnaia a pawm tâk a ni. Pawisa fai leh ṭanpuina dang pek zat chu a hmaa mi ang a ni ang.

Lalbiakzama chuan, Tripura-a Bru zingah mahni thua Mizorama rawn let an awm zauh zauh a, chungte chu sorkar aiawhte'n an enfiah zel a, Mizoram mi dik tak an nih chuan chhawmdawlna pawh an pe nghal zel tih a sawi. Bru lak letna atan hian Mizoram Home department-in MHA sum pek sa cheng vbc. 4 vel an la nei a, chu chu a hlawma Bru lâk lêt nana hmang loin, mahni thua Bru rawn lette chhawmdawlna atan hman rih tura ruahman a nih thu Vanglaini a hrilh.

Home department additional secretary sawi danin Bru lak let hna thawk turin an inbuatsaih a, tunah chuan MHA-in sum a pek chhuah leh hun an nghak mek a ni.

Ruahman dan chuan, Mizoram mi Bru rawn lette chu pawisa Rs. 85,000 pek tur an ni a; a thlawna kum hnih chhung ei tur an dawn tur chu ni khatah puitlingin buhfai gram 600 leh naupangin gram 300 a ni ang.