NHM hnuaia hnathawhte thlirho a ni Kum kal mekah nausen 659 thi tawh

National Health Mission (NHM)-a mission director CK Mishra hoin nimin khan Aijal Club-ah Mizorama Health department officer-te'n Mizorama NHM hmasawn dan tur an sawiho. Meeting-ah kumin sorkar kum kal mekah naupang thi 659 an awm tawh thu tarlan a ni.

NHM mission director chuan, naupang hnena hri danna pek ṭhin chu a huam chin zawng zawngin a hun taka an lâk theihna tur leh vaccine-in a dan theih natna vanga thi an awm tawh lohna atan ṭan la turin kalkhawmte a chah a; ngaihtuahna thar nei an awm a nih chuan sorkarin a ngaih pawimawh tur thu a sawi.

CK Mishra chuan, NHM chu damdawi-ina inenkawlna ṭha dawng phâk lo, hmun kilkhâwr zawka chengte'n inenkawlna ṭha an dawn theihna atan sorkar laipuiin a din a ni tih a sawi a, "NHM hi Mizoramah a ṭhang chak hle tih a lang a, chutihrual chuan an thlen chinah mipuite hriselnain hma a sawn phah em tih hi intehna tur a ni," a ti.

Nausen kum khat hnuai lam thi zat tehna, Infant Mortality Rate (IMR) chungchang sawiin CK Mishra chuan, "Mizoram IMR hi national IMR aia a hniam zawk hi thil lawmawm a nih rualin, ngaihṭha taka awm mai theih erawh an ni lo. Hospital leh medical care pek theihna hmun, doctor-te kut ngeiah an tlûk luh tawh phei chuan nu, nau chunga thi leh nausên piang hlim thi an awm loh nan fimkhur leh uluk lehzuala thawh a pawimawh," a ti a; raicheha thi leh nausen thi an awm lohna tura theihtawp chhuah turin Health department-a thawkte chu a chah a ni.

NHM mission director chuan, district ṭhenkhat hmasawn chak bik vanga ram pum tehnaa sánga lan ringawt a tâwk lo tih sawiin, "Mipui hriselna tiṭha turin district tinte'n rual takin hma an sawn tlang tur a ni a, a hnufual bik district-te kan ngaih pawimawh a ṭul. Vantlang rinkai ni tur chuan sorkar enkawl damdawi-inte fai leh thianghlim taka enkawl a ṭul a, thil lian tham leh ropui tak tak kan buaipui mek lai hian, a bulṭhut lam kan ngaihthah tur a ni lo," a ti.

NHM mission director hian nimin vek khan Aibawk damdawi-in (PHC) leh Melriat sub-centre a tlawh bawk.

Mizoram sorkara Health depart­ment secretary Arun Goyal-a'n a sawi danin, April 2014 aṭanga January 2015 thlenga Mizorama nausen thi zat chu 659 a ni a, IMR chu 35 (nausen 1000 zelah 35 an thi tihna) a ni. Nausen thla 9-11 inkar hri danna la kim thei zat chu 15,367 an ni a, thla 12-23 inkar hri danna la kim thei zat chu 3,356 niin, 67.4% a ni.

Mizoram IMR hi kum 2008-ah 37 a ni a, India rama IMR chu 53 a ni. Kum 2013-a Mizoram IMR chu 35 a ni a, India ram puma IMR chu 40 a ni. Kum 2013-14 chhunga Mizorama raicheha thi zat tehna, Maternal Mortality Rate (MMR) chu 76 (nu nuai khatah raichehin 76 an thi tihna) a ni a, India ram pumah 178 a ni.

Mizoramah mi 3,100 zelin doctor pakhat inṭawm awm ang a ni a, India ram pumah mi 41,760-in doctor pakhat inṭawm ang a ni.