District-ah NLUP tuaitharna hun hmang

Nilaini leh nimin khan district khawpui hrang hrangah NLUP tuaithar lehna hun, 'Revitalization of NLUP' hman a ni a, minister-te'n an hmanpui.

Champhaiah chuan Champhai Town Hall-ah Nilaini khan neih a ni a, minister H Rohluna'n a hmanpui. H Rohluna chuan, "NLUP hi chhungkaw intodelh­na atana kan hman theihna turin sorkarin ṭhahnem a ngai hle a, a dawngtu mipuite pawhin a hma aia ṭhahnem an ngaih lehzual theihna turin he hun hi buatsaih a ni," a ti a; NLUP hlawhtlinna tak tak chu a dawngtute kutah a innghah thu a sawi.

Lawngtlaiah chuan Nilaini khan CYLA Hall-ah hman a ni a; khuallian, minister C Ngunlianchunga chuan, "Pawisa sem ringawt hi sorkar thil tum a ni lo a, mirethei leh harsa zawkte'n leirem an rah ve theihna tura ṭanpui hi sorkar rilru a ni. NLUP dawngtute'n dik tak leh fel taka ṭanpuina an dawnte an hman a ngai a, enfiahna uar deuh deuh a ni ang," a ti.

Revitalization of NLUP Mamit-ah chuan minister John Rotluangliana hoa hman a ni a, minister chuan, "Mizo mipuite tana kan tui zawng leh kan châk zawng tak hmanga eizawnna ngêlnghet kan neih theihna tur atan ṭanpuina kan dawn hi a dawngtute'n a nihna tur dik taka kan hman a pawimawh hle a ni," a ti.

Serchhipah chuan DC conference hall-ah nimin khan minister Lal Thanzara hoa hman a ni. Lal Thanzara sawi danin, NLUP hi Mizoram ṭhenawm Manipur, Arunachal Pradesh leh Nagaland aṭang pawhin an rawn zir chiang tawh a, United Nations Organisation hnuaia agency lian ber berte'n NLUP thil tumte tihchak lehzual nan Mizoram sorkar thawhpui an duh a, Aizawlah an thuthmun tur ngaihtuah mek a ni.

Saiha-ah pawh nimin khan Revitalization of NLUP hi Laila Hall-ah hman a ni a, minister C Ngunlianchunga leh MADC chairman LC Chakhai ten an hmanpui.