Scholarship-a harsatnate sawipui

Mizo Students Union (MSU) hruaitute chuan nimin khan Mizoram Scholarship Board (MSB) hotute an kâwm a, zirlaite'n scholarship-a harsatna an tawhte leh a sutkian dan turte an sawipui.

MSU hruaitute sawi danin, post matric tribal scholarship chu zirlai ṭhahnem takte account-ah a lut tawh a, nimin khan state páwna Mizo zirlaite leh Mizoram University (MZU)-a zirlaite bank account-ah pawisa thun ṭan a ni.

Zirlai ṭhenkhat, scho­larship dawng tur ni si, an bank account (a bikin college zirlai)-a pawisa la lut lo a awm a; zirlaite'n an bank account number an college-a a thehluh chu college-a thawkte'n MSB-ah a hlawmin soft copy-in an thehlut a, chutah chuan bank account number-ah kim lo tam tak a awm niin an sawi.

MSU hruaitute chuan, scholarship dawng tur la dawng lote chu passbook kenga MSB-a zawt chiang turin an ngen a; scholarship hosteller anga dil, day scholar anga dawngte chu bank passbook update nen MSU office-a thehlut turin an ngen bawk.