MPSC member-ah pastor dah ṭha lo ti

MNF party chuan thuchhuah siamin, Congress sorkar chuan Mizoram Public Service Commission (MPSC) member ni turin Mizorama koh­hran­a pastor ṭhenkhatte a dàwr niin an tarlang a, ṭha lo an tih thu an puang.

MNF chuan, Cong­ress sorkarin MPSC chairman atana an party mi leh sa, politician Andrew Lalherliana February 28, 2015-a ruat a ni chu ṭha lo an tih tawh laiin, member-ah pastor pension-te dah tuma an be kual chu kohhran tihlawm an tum hrim hrim vanga an ngaih thu an sawi.

MNF tarlan danin, sorkar chuan MPSC member tur hian Mizorama kohhrana pastor ṭhenkhatte MPSC member ni turin a be kual a; pastor ṭhenkhat chuan kum 62 chung lam an nih tawh avangin an kumin a tlin tawh loh thu te, an thawhpuite an ràwn tur thu tein an lo chháng a ni.

MNF chuan, "Sakhaw rawngbawltute MPSC member atana Cong­ress sorkarin a thlêm chhan hi kohhran leh tlawmngai pawl, sorkar hnathawkte‘n Pu Lal Thanhawla sorkar chêt vel dan an demzia te, a bikin zu an zawrh dawn vanga kohhran tihlung­awina hmanrua atana hman tumna ni ngeiin kan hria... Hmai phih fai tum nana MPSC member-a sakhaw puithiamte hnuh luh an tum hi tenawm kan ti tak zet a ni," an ti.

MPSC member atan sakhaw puithiamte an tel a ṭulna hi a awm hran lo tih sawiin, MNF chuan, "Pastor an tel kher hi dan­in a phût lem lo," an ti a; MPSC member turte chu mithiam leh mi bik, Central Service emaw, MCS emaw, sorkara tawn­hriat nei leh mi hmingṭhate ruat ni se an duh thu an sawi bawk.