APYE Thailand thlirletna hun hmang
Nimin khan Mizoram Youth Commission (MYC) pisaah MYC chairman Dr Vanlalṭanpuia, MLA hoin Asia Pacific Youth Exchange (APYE) Thailand 2020 thlirlêtna hun hman a ni.
Dr Vanlalṭanpuia chuan, APYE Thailand 2020-ah Mizo ṭhalai 10 leh facilitator pakhat an kal thu sawiin, "Sustainable development goals (SDG) 17 thupuia neiin Thailand-a thingtlang khuaahte group-a inṭhenin research an nei a, a hnuah symposium-ah an inel a, a ti ṭhate chu UN-in an project-ah an thun ṭhin," a ti a; APYE Urban Youth Academy managing director Hyungmin Kim nen a thuphungin Memorandum of Understanding (MOU) an sign thu leh
Mizoramin APYE a thlen ve hun tur atan sorkar a inhawn thu a sawi. APYE facilitator Ruatdiki Hmar chuan, APYE aṭangin Mizoramin hlâwkna tam tak a neih theih thu sawiin, "Thailand-ah chuan APYE emersion site vawi thum lo thlen tawhna khuate an awm a, chu'ng hmunahte chuan APYE project kaltlangin intodelhna leh tourism lama hmasawnna hmuh tur tam tak a awm," a ti. APYE Thailand 2020-a tel ve Prof. F Lalnunmawia, MLA, Horticulture Development Board vice chairman chuan, APYE Thailand-ah ram 21 aṭangin ṭhalai eng emaw zat an tel thu leh, chu'ng zingah chuan Mizo ṭhalaite an nêp bik loh thu a sawi a; MYC hotute chu enterprenuership lama Mizo ṭhalaite tana an inpeknaah fakawm a tih thu a sawi bawk.