Inremna siam vangin Kolasib district-a NH-306/06 kawngpui dan tihtawp a ni

Kolasib District Truck Owner Association (KDTOA), Kolasib district-a MTA, MTDA leh Kawnpui Town Driver's Association (KTDA)-te chuan kawngpui chhe lutuk thawm ṭhat phût nana August 22, Ningani aṭanga tiam chin awm loa Kolasib district-a national highway kawngpui an dan chu nimin khan an chhunzawm a; sorkar hotute leh kawngpui enkawl­tute nen an inrem avangin nimin chawhnu dar 2 khan kawngpui dan an titawp.

Lirthei enkawltu pawlte'n kawngpui an dan chung­changah hian nimin khan Kolasib DC con­ference hall-ah bawrhsap Robert C Lal­hmangaiha kaihhruaiin inbiak a ni a; in­rem­na neiin, chawhnu dar 1-ah inremna thu­thlung ziah a ni. Inremna an neih theih avang hian lirthei enkawltu pawlte chuan chawhnu dar 2 khan kawng­pui dan an titawp a ni.

Inremnaah hian Kolasib DC Robert C Lalhmangaiha, Kolasib SP David H Lalthangliana, NHIDCL manager C Thanhlira, Kolasib District Drivers & Welfare Joint Action Committee president H Lalchhanchhuaha leh PWD executive engineer R Lalduhthlanga ten hming an ziak.

An inrem dan ang chuan, PWD enkawl Bairabi-Zero Point, Bilkhawthlir-Kolasib leh Kawnpui-Khamrang inkar kawngte chu August 23 aṭanga thla khat chhungin pangngai taka lirthei thlan theihna turin kawngpui khuarte hnawh tur a ni a; NHIDCL enkawl Seṭhawn leh Kawnpui quarry inkara kawng chhe laite chu August 23 aṭanga ni 15 chhungin siamṭhat tur a ni. Inremna anga hna thawh a nih theih nan Kolasib DC-in a bawhzui ang.

Kolasib Bawrhsap chuan, lirthei enkawltute hmalakna chu thil ṭha duhna vang a nih thu sawiin, "Kawng ṭha neih hi deputy speaker leh bialtu MLA Pu Lalfamkima pawhin a ngaih pawimawh tak zet a, a hoa endik hna pawh neih a ni tawh a, chumi bawhzuina kal zelah theih ang anga hmalak a ni," a ti.

Robert C Lalhmangaiha chuan, hmalaknate'n rah ṭha a chhuah mek nia sawiin, NHIDCL-in an hnuaia contractor-te hnenah August 21 khan hriattirna an pe a, October 5, 2024 hmain kawng khuar zual lai hnawh vek turin an hriattir bakah, Mizoram PWD pawhin Sadguru hnenah hriattirna an pe bawk niin a sawi.

Kolasib DC chuan, Kolasib district chhunga kawngpui chu mi tin nghawng a nih thu sawiin, "Mizoram kawtchhuah a nih angin Mizoram a nghawng nghal a, chuvang chuan theihtawpa ṭang ruala hmalak a ngai. Ruahsur lai a nih avangin a khuar zual lai hnawhah insàwrbing hmasak a, working season-ah blacktopping a nih hnu pawhin a huhoa ṭhahnemngai taka vil tlan a ngai a ni," a ti.

Chak zawka hma la turin Kolasib SDO (Sadar) kaihhruai working group din a nih thu te, NH chungchangah meeting a rang thei ang berin NHIDCL leh PWD contractor-te nen nei tura ruahmmanna siam a nih thute Bawrhsap chuan a sawi bawk.

Ṭhutkhawm zawh Kolasib DC hian kawng siam mek a hmunah a enfiah nghal a ni.

KAWNG CHUNGCHANGA INREMNA

▶ Kolasib district huam chhunga Mizoram châk lakna kawngpui NHD-III, PWD enkawl Bairabi-Zero Point, Bilkhawthlir-Kolasib leh Kawnpui-Khamrang te hi August 23, 2024 aṭanga thla khat chhungin kawngpui khuar lai hnawha pangngai taka kal theih turin an siam hman tur a ni.

▶ Kolasib district chhunga Mizoram châk lakna kawngpui NHIDCL enkawl Seṭhawn RTP Workshop kawng chhe lai leh Kawnpui quarry kawng chhe laite hi an lo intiam tawh angin August 23, 2024 aṭanga ni 15 chhung­in lirthei eng chi pawh nuam taka zawh theih turin an siam hman tur a ni.

▶ A chunga kan tarlan point pahnihte hi Kolasib DC-in tihlawhtling ngei turin theihtawp chhuahin hma a la zui

nghal ang.