AR chhuahsan ram hman dan turah zau zawka mipui nena inràwn a ṭha - CM

Chief minister Lalduhoma chuan, Aizawla Assam Rifles battalion an chhuah hunah an chhuahsan ram hman dan turah zau zawka mipui nena inràwn ṭha a tih thu leh, Aizawl chhuah lam leh tlâk lam by-pass siam tur a hlawhtlin hunah Aizawla lirthei tâwt lutuk a ziaawm hle a rinawm thu a sawi.

CM Lalduhoma hian UDPA department-in August 22, Ningania Aijal Club-a 'Aizawl Hmathlir' an buatsaih a hmanpuinaah thu sawiin, AR-in Aizawl laili aṭanga Zokhawsanga an insawn chhuah hunah an hmun chhuahsan hman dan tur chu zau zawka mipui leh pawl hrang hrang nena inràwn ṭha a tih thu a sawi a ni.

Khawpuia pem (urbanisation) chu khawvel kalphung pakhat a nih thu sawiin Lalduhoma chuan, "World Bank chhût danin kum 2050-ah chuan mihring hmun thuma ṭhena hmun hnih hi khawpuiah kan cheng tawh dawn. Aizawl pawh a ṭhang chak em em a, hmathlir fel tak neia kan inbuatsaih a ngai. Chumi atana UDPA inbuatsaihna a fakawm hle a ni," a ti.

Chief Minister chuan, kumin kum tìr lama sorkar laipuiin Aizawl chhuah lam leh tlâk lama Aizawl by-pass road siamna tur a pek chu a hlawhtlin hunah chuan Aizawl khawpuia lirthei tâwt lutuk a ziaawm hle a rinawm thu a sawi a; Aizawlin bawlhhlawh paihna mumal leh mamawh phuhru zo tak a mamawh thu te, thlânmual inṭâwm a mamawh thu te, kea kalna tur tam zawk te, lirthei dahna tur tam zawk te, sumdawnna hmun bik zau leh ṭha a mamawh dante a sawi bawk.