UDPA-in 'Aizawl Hmathlir' buatsaih

Urban Development & Poverty Alleviation department chuan August 22, Ningani tlai khan Aijal Club-ah 'Aizawl Hmarthlir' tih an buatsaih a, Aizawl tihhmsawn dan tur leh hma lam hun turte sawiho a ni. Chief minister Lalduhoma leh UDPA minister K Sapdanga bakah, Aizawl bialtu MLA-te leh AMC corporator-te an tel.

Inlawmna thu sawitu UDPA Minister chuan, Aizawl khawpui tihhmasawnna atan UDPA-in hmalakna chi hrang hrang - zawh tawh, thawh mek leh hmachhawp eng emaw zat an neih thu a sawi a, "Chu'ngte chu inhrilhhriatna hun kan hmang dawn a, 'Aizawl Hmathlir’ tia vuahin kan hmalaknate kan thlirho dawn a ni," a ti.

K Sapdanga chuan, Aizawl Hmathlir an buatsaiha an thlir tur tam zawk chu sorkar hmasa hmalakna leh hma­chhawp a nih thu sawiin, "Term hmasa lama UDPA lo enkawltu kan minister hlui Pu Tawnluia rilruah a lo lang a, a chungah lawmthu sawi kan ba nasa hle. Hma an lo lakna tam tak avangin Aizawl khawpuiin hmel thar kan hmu chho zel a, kan hmu chhunzawm zel dawn bawk niin a lang," a ti a; UDPA Minister hmasa hmalaknate chu ṭha taka chhunzawm zel an tum thu a sawi.

Aizawl Hmathlir hi UDPA joint secretary Zarzokimi'n a kaihruai a, UDPA director Dr Andrew H Vanlaldika leh Aizawl Smart City chief executive officer CC Lalchuangkima ten thupui an sawi.

UDPA Director hian 'Aizawl khaw chhunga veivahna ṭha zawk ruahmanna' (Aizawl Sustainable Urban Transport Project) a sawifiah a, Asian Development Bank sum hmanga thawh tura duan a ni. Aizawla ropeway/cable car, city bus service changtlung zawk ruahman, corridor & junction improvement, skywalk, regional truck, bus & maxicab terminal, vertical mobility leh multi level off-street parking siamte leh, Assam Rifles insawn huna ram hman dan tur an ruahmannate a lem nen a sawifiah.

Aizawl Smart City CEO-in 'Aizawl - khawpui fai' tih sawiin, bawlhhlawh sawngbawlna neih mek leh siam belh mek dinhmun te, leivûng paihna tur ruahmannate a tarlang a; Integrated Command & Control Centre (ICCC) hman ṭangkai dan tur sawiin, Aizawl khawpuia hmun 76-ah CCTV dah a nih tawh thu te, Automatic Number Plate Recognition System hmun 14-ah dah a nih thu te, hmun 15-ah free wifi dah a nih thu te, bawlhhlawh phur lirthei 160-ah GPS tracking device vuah a nih tawh thute a sawi bawk.

Sawihona hun hman a ni a, UDPA secretary Lalmalsawma Pachuau-in a kaihruai a ni.

UDPA MINISTER TARLAN ṬHENKHAT

* Tuiriala Solid Waste Management Centre-ah mechnical compost hman ṭan a ni tawh a, bawlhhlawh ṭawih thei chu leiṭha siam nan hman zel a ni.

* Tuiriala bawlhhlawh paihna hmunah tho July 25, 2024 khan Mizorama a hmasa ber ni turin Common Bio-Medical Waste Treatment Plant hawn a ni a, pilot project-ah Aizawl leh Saitual district-te tan enchhin a ni.

* Bawlhhlawh ṭawih thei bik khawnna truck July 22, 2024 aṭangin Ramhlun South leh Aizawl Venglaiahte tlân ṭantir a ni.

* UDPA hian khaw chhung inkalpawhna mai bakah, mipui mimir ṭangkaipui tur thil chi hrang hrang siam kawngah hmalakna kan nei nual.