Bawngkawna thia chhar vanga man mi pathumte jail-ah dah luh an ni

August 19, 2024 zinga Bawngkawna thia chhar Freddy MS Dawngzela (23) s/o Lalmuankimi, Ramhlun South thihna kaihhnawiha police-in an man mi pathumte chu jail-ah an awm mek. Thil thleng chungchangah hian Ramhlun South khawtlang chuan, hnu chhuinaah hmalakna a chak lo a nih chuan thuneitute puih an inpeih reng thu an tarlang.

Thu dawn danin, Freddy MS Dawngzela thia chhar chungchang hi police-te chuan bawhzui nghalin, August 19, 2024 khan Bawngkawn Police Station-ah thubuai an ziak lut a; thubuai ziah luhnaa dan tlawhchhan chu - Bharatiya Nyaya Sanhita (BNS) Section 108/351(2) a ni.

BNS Section 108 leh 351(2) chu mi tu emaw mahni intihlum tura nawrtu/fuihpawrhtu hrem theihna dan a ni a, kum 10 thleng jail tàn leh pawisa chawi theihna a ni a; police-in an chhui zui mek.

Thu dawn danin, August 18, 2024 (Pathianni) zanah Freddy MS Dawngzela, Zahmingthanga (28) s/o Sangvuana, Vawmbuk, Lawngtlai district (Bawngkawna cheng mek), K Laldampuii (23) d/o K Lalhruaitluangi, Tuikual North leh Lalrinfeli (28) d/o A Ngurthantluanga, Bungkawn Vengthar te chu Bawngkawna Khiangte Homestay-ah an riak a ni.

A tûk August 19, Thawhṭanni zingah Freddy MS Dawngzela chu thia chhar a nih avangin Khiangte Homestay-a a riahpui Zahmingthanga, K Laldampuii leh Lalrinfeli te chu police-in BNS Section 194 (vantlang hmuna insualbuai leh vantlang rálmuanna tihbuai) tlawhchhanin an man. Hun eng emaw chen police-in an kawl hnuah K Laldampuii leh Lalrinfeli te chu nimin khan jail-ah dah luh an ni a, Zahmingthanga chu a hmain jail-ah dah luh a lo ni tawh bawk.

Ramhlun South Local Council, YMA, MUP, MHIP leh Village Defence Party (VDP)-te chuan nimin khan thuchhuah inṭâwm siamin, Freddy Malsawmdawngzela thihnain Ramhlun South mipui a ṭhàwng thu an tarlang a, "He thihnaah hian mawhphurtu an awm ngei niin kan hria. He tualthihna bawhzui a, a mawhphurtute man a, a ṭul anga hremna pe tur hian thuneitute pawh kan beisei tlat a, veng chhung mipui pawhin theihtawp chhuahpui kan inhuam reng a ni," an ti.

Ramhlun South khawtlang hruaitute chuan, Freddy MS Dawngzela thihna chungchangah social media leh thu léngvâk hrang hrangah fimkhur turin mipui an ngen a; hnu chhuinaah hmalakna a chak tâwk lo nia a lan chuan a ṭul anga thuneitute puih an inpeih reng thu an tarlang bawk.