M Pox laka inrálrin dan tur sawiho; India ramah M Pox vei an la awm lo

Health & Family Welfare department hotute nimina Health Services director meeting room-a ṭhukhawm chuan ram ṭhenkhata léng mek Monkey Pox (M Pox) Mizorama a lo luh palha inrálrin dan tur an rêl. HFW chuan, Siaha naupang M Pox vei hmuh chhuah anga social media-a thehdarh chu thu dik lo a nih thu an tarlang.

Ṭhutkhawm hi HFW principal director Dr Vanlalsawma'n a kaihruai a, Integrated Disease Surveillance Programme (IDSP) state nodal officer Dr Vanlalrengpuia'n ram hrang hranga M Pox lên mek dan te, hri laka invên dan leh hri veite enkawl dante a sawifiah. India ramah M Pox hmuh la ni lo mah se, ram hrang hranga mite inkalpawhna a awlsam tawh avangin India ramah a lut lo ang tih sawi theih a nih loh thu a tarlang.

HFW department hotute ṭhukhawm hian Core Committee on M Pox an din nghal a, Core Committee hnuaiah committee péng hrang hrang la din chhâwn leh tur a ni. A ṭul dan angin thuneitu sang zawk kaihhruainain state level committee la din chhoh turin an rêl bawk.

Health department chuan, tun hnaia Siaha naupang pakhat M Pox hri vei hmuh chhuah a awm anga social media hrang hranga thu thehdarh chu thu dik lo a nih thu leh tangseh (chicken pox with secondary infection) a nih thu an tarlang a, "Naupang pawh hi tunah chuan a dam tawh," an ti.
HFW department chuan, social media-ah thuthang dik lo a awm ṭhin chu pawi an tih thu tarlangin, thil chiang lo, mipui thin tiṭháwnga tithlabár thei thil thehdarh lo turin mipui an ngen a; M Pox chungchangah chî-âi lo tur leh sorkar leh Health department hmalaknate ngaichâng thiam mipui an chah bawk.

Health department tarlan danin, M Pox chu Mizo ṭawnga a hming phuah a la ni lo a; Mizote'n záwnghri tia an sawi ‘small pox’ nen a inang lo a, ngaih pawlh loh tur a ni.

Nimina ṭhutkhawma tarlan danin, Zoram Medical College chu Indian Council of Medical Research (ICMR)-in sentinel site atan a puan tawh avangin tihchangtlun chhoh a ni a, India rama laboratory ṭha zual 28 zingah a tel tawh. ZMC hian December 2023 aṭang khan hripui léng a awm palh pawha inrin lâwk dan tur ruahmanna a kalpui tawh a ni. Lunglei Civil Hospital pawh tihchangtlun deuh chuan sentinel site atan hman mai theih beisei a ni bawk.

Nimina ṭhutkhawmah hian Health Services leh Hospital & Medical Educa-tion-a officer eng emaw zat an tel a ni.