PUC-in NIRF ranking-a 35-na an lawm

Pachhunga University College chuan National Institutional Ranking Framework (NIRF) Rankings 2024-a India rama college ṭha 35-naa thlan an nih chu nimin khan an seminar hall-ah an lawm a; khuallian, chief minister Lalduhoma chuan, sorkarin zirtirtu quarters a ngai pawimawh a, eng emaw zat an sak dawn thu a sawi.

Chief Minister chuan, zirna-in hrang hrangah zirtirtu indaih lohna a nasat thu a sawi a, "UPSC exam-ah kan tling thei ta lo hle a, kan indem a, mahse, kan ram zirna hi NAAC grade A-te pawhin minimum staff kan nei hlei thei lo a, kan college building-te a chhe em em. Thingtlangah engati nge posting-a an kal duh loh kan tih chuan in luah tur an hriat loh ṭhin vang a ni. Chuvang chuan tun sorkar hian zirtirtu quarters hi kan priority-ah kan dah a, eng emaw zat kan sa dawn," a ti.

Tun hmain NABARD aṭangin loan tam tak lak a nih ṭhin thu sawiin Lalduhoma chuan, "Rulh leh ngai a ni a, a pûka kan pûk a ni. Kan NABARD loan kha sikul sak nan 40% bak a thleng lo a, a pawi khawp mai. Corruption hian kan ram hi min tichhe hle mai a, keini chuan sikul kan sak reng rengin headmaster/principal-te'n completion certificate an pek loh chuan a bill kan pe dawn lo. Anni khan an sikul sak an enpui dawn a ni," a ti a; headmaster/principal-te'n an hmuh phak loh leh inrawlh phak loha DPR siama sikul sakte a chhe ṭhin niin a sawi.

CM Lalduhoma chuan, ram changkangte ngaih pawimawh chu hriselna leh zirna a nih thu sawiin, "Keini pawhin heng sector-ah hian a tam thei ang ber dah kan duh. Zirtirtu hlawh daih hi kum khat budget-ah an lo la dah ngai miah lo a... theihtawpin heng department hi thuam ṭhat kan tum a, sum pawh a ṭul angin a awm ang ang pek kan duh," a ti.

PUC-in kum thum chhung a záwna NIRF Rankings top 50-a an lang chu chhuanawm a tih thu a sawi bawk.

Inkhawmah hian khualzahawm Dr Vanlalthlana, Education minister leh Mizoram University vice chancellor Prof. Dibakar Chandra Deka bakah, hotu dangte pawhin thu an sawi.

NIRF Rankings-ah hian PUC hi kum 2018 khan a tel ve ṭan a, kum 2021 thlengin 101-na leh 150-na inkarah an awm ṭhin. Kum 2022 aṭangin top 50 chinah an lang a, kum 2022 khan 45-na, kum 2023-ah 34-na leh kumin 2024-ah 35-na an ni. NIRF Rankings 2024-ah hian India rama college 3,371 an tel a, 182 chu hmarchhak state-a mite a ni.