CM-in corruption dopuiah ṭhalaite a sáwm

Chief minister Lalduhoma chuan, Hand Holding Policy an kalpui turah party an en dawn loh thu a sawi a, "Hei hi mipui sorkar a ni. Sem hi hlawhtlinna a ni lo a, thawhrim hi hlawhtlinna a ni tih kan ṭhalaite hriattir kan duh," a ti a; corruption dopuiah ṭhalaite a sáwm.

Pachhunga University College-in NIRF 2024 Rankings-a 35-na an nih nimina an lawmnaah Chief Minister chuan thu sawiin, Hand Holding Policy an tlangzarh thei ṭêp tih a sawi a, "Nu leh pa eiru ṭhinte hi an fate'n kan duh loh thu kan hrilha kan do phawt chuan an tih luih ngam ka ring lo. Corruption do turin ṭhalaite i ṭang tlang ang u," a ti.

Chief Minister chuan, Hand Holding Policy-ah a hlawhtling tur chiah, chu pawh pilot project-in mi tlemte kuminah an kalpui phawt dawn tih a sawi a, "Sem hi hlawhtlinna a ni lo, thawhrim hi hlawhtlinna a ni tih Zoram ṭhalai hriattir kan duh a ni," tiin, PUC zirtirtute leh zirlaite chu themthiamna (skills) lamah ngaih­tuahna hmang turin a chah.

Hand Holding Policy-ah cheng nuai 50 hnuai lam loan-ah sorkar chu quarantor-ah a ṭan dawn thu sawiin Lalduhoma chuan, "Mahse, trade/project thlante hlawhtlinna tlak a ni em, market a ṭha dawn em tihte nodal department-in uluk takin an endik dawn a, hei hi eng party nge a nih tihlam pang kha en tel kan awih dawn miah lo," a ti.

Chief Minister chuan, Hand Holding Policy chu central sheme-a Micro, Small & Medium Enterprise bakah scheme dangte nen kaih kawp (convergence) an tum thu a sawi a, "Central scheme-ah hian interest free chin a awm a, a free chin bak kha state sorkarin kan tum dawn a, chuvangin 100% interest free a ni dawn. Chutiang kara kan ṭhalaite kan din chhuah loh chuan bána ,kaih tlak kan awm lo tihna a ni ang a, kaih pawha kal duh lo kan ni tihna a ni ang," a ti a; zirlaite chu an zilai an zawh huna an tih tur ngaihtuah lâwk turin a chah bawk.

CHIEF MINISTER THUSAWI DANGTE

☑ Investment policy pawh kan lo la nei ngai lo a, hmanhmawh takin kan duang chawp a, tunah hian national/international aṭangin investment rawn tih duh an tam lutuk.

☑ Investment rawn ti duh nazawng kan entertain dawn lo a, kan ṭhalaite kawng dâl tur chi chu kan pawm thei lo. Kan ṭhalaite thawhpui thei tur chi company ṭhate erawh chu kan la lut lo thei dawn lo.

☑ Tih tak zeta hlawhtlin tuma ṭhalaite an kal chuan kan ram GSDP leh per capita income a sang vat ang a, BPL pawh kan tlem sawt ang. Châwmhlâwm kan tlem chuan kan lak luh a pung dawn.

☑ Miin trade an thlanin, nodal officer/department-te'n ngun takin an enzui ang a, chuta loan an lak chu an hmang ngei tih an
finfiah ang.

☑ Central scheme-ah marginal money-a awm a, a sang pawl chu 35%-te a ni. Loan an la a, an lak zawh veleha an vawm hlum leh a, marginal money kha loan latu leh bank-a thawkte'n an insem ṭhin. Hetiang hi a awm vaih chuan kan hrem na khawp ang. Project atana loan la, ngaihsak lo ang chi kha a awm tawh tur a ni lo.

☑ Loan lakna tur project rawn recommend-tu nodal officer khan, loan latuin a thawh zawh hma chu a enkawl theih nan transfer loh hram tur a ni kan ti.