Chakma páwnchhuah khapna hlîp

YMA leh MZP-te'n Lunglei district chhungah Chakma-te pawnchhuah an khap chungchang chu Lunglei bawrhsap R Lalṭhazuala'n nimin khan a pisaah pawl hruaitute a sawipui a; MZP chuan Chakma pawnchhuah an khap chu nimin khan an titawp.

MZP Hqrs, Lunglei chuan thuchhuah siamin, Chakma páwnchhuah khap chu tihtawp rih an rêl thu an puang a, "August 17, 2024-a Mausen leh Tlawng inkara sumdawng lo suamtu Chakma pangate lung-inah khung an ni tawh a, August 19-a Borapansury-a Mizo police kutthlaktute chhui mekah case ziah luh a ni tawh bawk. Hei bakah hian Magisterial Inquiry din a nih tak avangin Chakma páwnchhuah khap tlai dar 4 (August 23) aṭanga tihtawp rih rêl a ni," an ti.

Tlabung MZP Sub-Headquarters chuan Borapansury-a thil thleng vanga Chakma-te páwnchhuah khapna thuchhuah an siam chu nimin tlai dar 4 aṭanga hnuhkîr an remti a; Khawthlangtuipui Group YMA chuan Chakma-te páwnchhuah an khapna chu nizan dar 12-ah hlih an remti bawk.

Lunglei DC hoa ṭhutkhawmah hian Lunglei SP, Lunglei Sub-Headquarters YMA President leh Lunglei Headquarters MZP President, Tlabung SDO (Civil) leh SDPO, Khawthlangtuipui Group YMA President leh Tlabung Sub-Hqrs MZP President-te an tel. DC chuan, thubuai ziah luh a ni tawh a, dan anga hmalakna kal mek a nih avangin Chakma páwnchhuah khapna leh hrêkna sût turin YMA leh MZP hruaitute a ngen a ni.