Hmasawnna tluantling zawng zawng hi Congress sorkar laia neih a ni - Thanzara

Mizoram Pradesh Congress Committee (MPCC) president Lal Thanzara chuan nimin khan Congress Bhavan-a political session-ah thu sawiin, Mizorama hmasawnna tluantling zawng zawng chu Congress sorkar laia an tih vek niin a sawi.

Lal Thanzara chuan, Mizoram UT aṭanga sorkar ding tawh thlirin Congress sorkar laiin Mizoramin Pathian malsawmna a dawng nasa ber em ni chu aw tih tur a nih thu a sawi a, "Kan rama hmasawnna tluantling zawng zawng hi Congress sorkar laia kan neih a ni. Power chungchang te, Referral Hospital mai ni lo medical college thlenga din te, kan mamawh tui te, airport leh helicopter service te, ṭhalai infiammite mamawh infrastructure-te Congress sorkar laia Pathian malsawmnaa kan neih a ni," a ti.

MPCC President chuan, "MLA pakhat chauh kan nei chung hian mi rêng rêng hian ZPM chu an sorkar rei lo ang, a dawtah chuan nangmahni in ni ang an tite hi a mak ang reng hle. Mipuite pawhin Congress party-ah rinna an nghat chho mek zel a ni," a ti a; friday session apianga hall hawn zauh ngai khawpa Congress an pungkhawm ṭhin chu an inlungrualzia tilangtu a nih thu a sawi.

Rambuai hre lo ṭhangthar, lehkha tak tak chhiara bih chiang peih lo, social media-a innghatte thluak ZPM-in an sû nia sawiin Lal Thanzara chuan, "Kum 30 chhungin MNF leh Congress insorkar chhawk kha engmah an ti lo, tiin keini min enchhin rawh u an ti a. Social media avangin ZPM a sorkar a, social media avang vêkin sorkar aṭanga an chhuah leh thuai ka ring," a ti.