KHAWTHLIR

KṬP-in thisen pe

KṬP, Kawnpui Chhimveng Branch chuan nimin khan thisen pek an huaihawt a, Kolasib District Hospital tan thisen unit 44 an pe a, petute mipa 33 leh hmeichhia 11 an ni.

Pension scheme

Assembly deputy speaker Lalfamkima, Kolasib bialtu MLA ni bawk chuan nimin khan Kolasib Press Club-ah Mizoram Journalists' Association, Kolasib District-in pension scheme an ruahman a tlangzarh. Lalfamkima chuan, pension scheme bul ṭanna atan Rs 1,00,000 a tum tur thu a sawi.

I-Day music destival

Akashvani (All India Radio), Aizawl leh Mizoram Law College chuan Mizoram Law College legal chamber-ah Independence Day lawmna pualin Independence Music Festival an buatsaih a, Assembly speaker Lalbiakzama'n a hmanpui. Speaker chuan, "Dikna tun din kawnga Mizoram hma lam hun hi zirlaite kutah a awm," a ti. He hunah hian Doordarshan, Aizawl director Naupibau Marinmai bakah Akashvani hotute leh zirlaite an tel a ni.

Career guidance

Mamit Officers’ Club (MOC) chuan nimin khan Mamit Chhimveng YMA Hall-ah zirlaite tan MOC Rahbi (A Career Guidance and Counselling Initiative of Mamit Officers’ Club) an buatsaih. An hun hmanpui Mamit DC Jacob Lalawmpuia chuan, "Pathianin min siam danah hah taka thlan tui tlaa hna thawk tur kan nih avangin hrehawm tuar huama zir leh hnathawh a ṭul a, hlawhtlinna kawng pawimawh tak a ni," a ti.

AIDS kawngzawh

Siaha bawrhsap VL Hruaizela Khiangte kaihhruaiin nimin khan District AIDS Prevention & Control Committee chuan ‘Intensified IEC Campaign: India fight against HIV/AIDS & STI' leh Red Ribbon School Quiz Competition 2024 chungchang an sawiho. Campaign pualin August 29, 2024-ah kawngzawh huaihawt an rêl.