Kum 2014-15 chhungin Mizo zirlai Scholarship dil mi 2,28,449 an awm
Sorkar kum kal mek, 2014-15 chhungin Mizo zirlai, scholarship dil mi 2,28,449 an awm. Mizoram Scholarship Board (MSB) secretary Dr Rualthansanga chuan, tunlaia Post Matric Tribal Scholarship sem mekah zirlai tam tak bank account-a sum la lut lo chu IFSC code leh account number ziah dik loh vang a nih thu Vanglaini palai zawhna chhangin a sawi.
Vanglaini-in MSB aṭanga thu a dawn danin, kum 2014-15 ah hian Post Matric Tribal Scholarship dil zirlai 81,318 an awm a, Pre Matric Tribal Scholarship (class IX & X) dil mi 3,034 an awm. Pre Matric Minority Scholarship dil mi 1,43,625 an awm a; Post Matric Minority Scholarship (online) dil mi 472 an awm bawk.
Kum 2013-14 chhung khan National Schemes of Incentives to Girls for Secondary Education (Class IX) chu zirlai 584-in an dil a, kum 2014-15-ah zirlai 1,531-in an dil leh. He scheme hi Class IX hmeichhe zirlaiin an dil a, Class XII an pass hnuah a pung nen vek an la chhuak thei a ni.
National Means cum Merit Scholarships Scheme hnuaiah Mizoramin qouta 103 a nei mek a, hei hi Class VIII zirlaite'n exam kaltlangin an dil ṭhin. MSB hotute chuan, Mizoram qouta hi hnawhkhah a ni ngai lo a, exam an tlem ṭhin chu pawi an tih thu leh, he scholarship dilte chuan an hmu vek tura ngaih a nih thu an sawi.
MSB secretary Dr Rualthansanga chuan zawhna chhangin, Post Matric Tribal Scholarship chu pek chhuah mek zel a ni a, zirlaite bank account-ah dah luh zel a ni tih a sawi a, "Zirlai tam tak account-a sum la lut lo chu IFSC code leh account number an ziah dik loh vangte a ni," a ti.
Dr Rualthansanga chuan, zirlaite bank account-a sum luh loh chhan chu MSB mawhphurhna a ni meuh lo tih a sawi a, zirna-in hrang hrangte'n soft copy-in zirlaite bank account kimchang MSB-ah an rawn thehlut a, fill-up dik loh a tam ṭhin niin a sawi.
Zirlai tam takin an sum dawn tur an dawng kim loa sawi chungchanga zawhna chhangin, MSB secretary chuan, "A tìrah 90% chiah thun turin bank-ah an tikal a, chumi hnuah sorkar ruahman angin 100% dah lut tura hrilh an ni a, hetah hian bank lama thawktute'n an thun sual palh a ni thei," a ti a; hosteller anga dil zirlai tam tak chu hosteller anga pek an ni lo a, day scholar anga pek an ni tih a sawi bawk.