MZU kawng siam chhunzawm dawn

Vaivakawn aṭanga Mizoram University kawngin a paltlang veng pariat telna, MZU Road Joint YMA Committee hruaitute chuan nimin khan UD&PA minister Zodintluanga a pisaah an hmu a, Vaivakawn-MZU kawng la siam zawh loh km. 1.8-a thui thawh chhunzawm turin an ngen. Minister chuan siam chhunzawm a nih dawn thu a lo hrilh.

Zodintluanga chuan, Joint YMA hruaitute chu khawtlang tana an hmalaknaah fakin, Chief Minister-in kawng siam hmabak la awmte chu kar leh chhunga hna thawk ṭan tura PWD hotute leh con­tractor-te a hriattir tawh thu a sawi a, "Central sorkar lam aṭanga sum lo kal tur a lo la thlen loh vanga hna chawlhsan lailawk tawh, sum awm lo chunga CM ngenna ngaih pawimawh a nih avangin kawng hi siam chhun­zawm leh tur a ni," a ti.

Sorkar thuchhuah tarlan danin, Vaivakawn-MZU kawng hi UD&PA department kaltlangin JNNURM hnuaiah hmasawnna ruhrel hrang hrang a din zingah telh a ni. Hna hi 85% zawh a ni tawh a, km. 1.8 vel thawh zawh loh a la awm. Thawh hmabak chhunzawm a nih dawn avangin MZU Road Joint YMA Committee chuan lawmawm an tih thu minister an hrilh.