KHAWTHLIR

VC/LC pawtsei
Mizoram sorkar chuan district paruk - Aizawl, Lunglei, Serchhip, Champhai, Kolasib leh Mamit district-a V/C ding lai 508 leh Aizawla local council ding lai 82-te term chu April 30, 2015 thleng a pawtsei leh. V/C leh LC term hi February 28, 2015-a tawp tur a ni a, mahse sorkar chuan March 31 thleng a pawtsei a, nimin khan April 30 thleng atan a pawtsei leh ta a ni.

In kâng ral
Sentetfiang, Lawngtlai district-a Dawtchunga in chu nimin chawhma dar 11:30 vel khan bungraw chuh hman lohin a kâng ral a, vawk pakhat leh ar pathum a kâng hlum.

Humhalh inzirtir
MHIP sub-headquarters, Lawngtlai chuan Ningani khan Lawngtlai Press Club-ah nungcha leh ramngaw humhalh chungchang inzirtirna hun an buatsaih a, MHIP gen.hqrs. president Lalthlamuani'n a hmanpui.

Thiin chhar
March 12, 2015 tlai dar 3 vel khan Zamuang khaw bula Borai luiah Roṭhuamluaia (59), Rengdil khua chu thiin chhar a ni a; Zawlnuam police leh YMA hruaitute'n a ruang an hlawm a, Zawlnuamah endik a ni. Thu dawn danin, Roṭhuamliana hi Tripura-a a kal chu a haw lo a, Ningani khan Borai luia inchiahin a ruang an hmu a ni.

UPC conference
UPC (NEI) hnuaia district pathum - Central, Chhimtuipui leh Churachandpur district-te chuan Ningani aṭang khan district conference an hmang a, Pathianni zanah a ṭiak ang.

Ukil nuar dawn
Mizorama ukilte chu March 16, Thawhṭanni khian Court-a thubuai ngaihtuahnaah an ding dawn lo. March 4, 2015-a Allahabad Court compound chhunga police officer pakhatin ukil a kah hlum avangin Bar Council of India-in ram puma lungawi lohna an lantir dawn a ni.