Mizoramah H1N1 vei hmu chhuak

New Delhi aṭanga Aizawla lo zin hnam dang pakhat, H1N1 vei nia rinhlelh chu endik a nih hnuah H1N1 a vei ngei tih finfiah a ni.

Thu dawn danin, H1N1 vei nia rinhlelh hnam dang pakhat khâk leh chil an lak chu Kolkata-a Indian Council of Medical Research hnuaia National Institute of Cholera and Enteric Disease-ah endik a ni a; March 12 tlai khan a result kimchang hriat niin, H1N1 a vei ngei tih hriat a ni.

Doctor-te sawi danin, New Delhi aṭanga lo zin H1N1 vei hi March 9, 2015 aṭang khan damdawi-inah enkawl a ni a, damlo dangte nen dah pawlh loin, a bika siam ICU-ah uluk taka enkawl a ni a; a dinhmun a ziaawm deuh tawh.

Hetih lai hian, Leng­pui Airport leh Vai­reng­teah state pawn aṭanga lo lutte chu H1N1 vei rinhlelh kai an awm leh awm loh endik zel a ni a; Integrated Diseases Surveillance Programme (IDSP) nodal officer Dr Pachuau Lalmalsawma chuan, nimin khan mi pakhat dang sample enfiah turin Kolkata-ah thawn leh a nih thu a sawi.