Zira'n mipui bum tumah MNF a puh MPSC member ruat tum dan a sawifiah

Congress party vice president R Lalzirliana chuan, Congress party kaihhruai sorkarin kohhrante a tlawn a ngai lo nia sawiin, MPSC member atana pastor/reverend dah tumna a awm anga MNF party-te'n an tarlan chungchangah MNF chu dâwta mipui bum tumah a puh.

Nimina Congress Bhavan-a inkhawmah thu sawiin, R Lalzirliana chuan, MNF-te chu Congress an beihna duhtui deuh se a duh thu sawiin, "Dâwt ringawt maia mipui lamṭanga siam tum hi thil dik a ni lo," a ti.

MNF party-in, 'Zu zawrh tum vanga Kohhran tlawn nana MPSC member-ah kohhran hruaitu sáwm,' anga an puhna chu chhangin, R Lalzirliana chuan, "Sorkar hian kohhran hi a tlawn a ngai lo a, sorkar hruaitute hi kohhran mi vek tho kan ni. Kohhran leh sorkar hian thawhhona ṭha leh zual kan nei ang tih an hlauh vang mai maia hetiang thu hi sawi an ni," a ti.

R Lalzirliana chuan, MPSC chu mi ṭha leh mi dik, Pathian ṭiha dik taka hna thawk ṭhinte awmna tur a nih thu sawiin, "Congress sorkar chuan kan sakhaw puithiam, mi dik leh rinawmte pawh hian an theihna leh thiamnate hi mipui tan dik tak leh rinawm taka Pathian leh kohhran mipuite rawng an lo bâwl ṭhin ang hian rawngbawlna siamsak a ṭha e, a tih vanga sáwm an ni tih hi MNF-te hian lo hria se," a ti.

MPCC vice president chuan, Congress sorkar chuan mi ṭha leh mi dik, mipuiin rintlaka an ngaih chu sakhaw rawngbawltu an ni emaw, politics-a hnûhma nei emaw pawh ni se, ruat pawi an ti lo tih a sawi.

MNF sorkar laia MPSC chairman atana mi pakhat an dah dan sawiin, R Lalzirliana chuan, CM Zoramthanga'n a sephung laihpui leh perhpawng kaw vûng a hâipui a dah niin a sawi a; CM Zoramthanga'n MPSC chairman a ruat dan chu zahthlak a tih thu a sawi bawk.