Aluminium mistiri training khâr

Central YMA leh Mizoram Building & Other Workers Welfare Board ṭangkawpin Central YMA Hall-a aluminium mistiri training an buatsaih chu nimin khan khâr a ni.

Khârna inkhawma khuallian, LEIT director Lalhmachhuana chuan, YMA chu hmanlai anga tlawmngai pawl mai a nih tawh loh thu sawiin, "Tun­ah chuan chhungkua leh ram nghawng thei thil ṭha tak tak a ti ṭhin a ni," a ti.

Central YMA treasurer J Lalsailova chuan, aluminium mistiri training chu YMA kumpuan - ram leh hnam humhalh bawhzuina zel a ni tih a sawi a; training chhuakte chu ram leh hnam tana training an ni tih hria a, theihtawpa an thiamnate hmang ṭangkai turin a chah.

Aluminium mistiri hi hmun hrang hrang aṭangin YMA member 36-in an zir chhuak a, zir chhuakte chuan an duh chuan mistiri hmanrua Rs. 70,000 man vel Rs. 38,000-in an lei thei dawn a ni.