CYMA-in na zawka Ruihhlo do an rel Kum 14 chhungin ruihhlo vangin mi 890 an thi

YMA Central Executive Committee, CYMA president Lalbiakzuala kaihhruaia March 14-a CYMA Committee Room-a ṭhukhawm chuan, ruihhlo na taka do turin a dona kawnga hma la tur bik din leh an rel. Hetihlai hian kum 14 (2000-2014) chhungin ruihhlo vangin mi 890 in nunna an chan.

YMA CEC chuan ram, khaw­pui leh khawtlang nun thlirin ruihhlo do pawl din thar leh ni se, an ti a; ruihhlo do pawl hming tur te, member turte leh a kalphung turte erawh chu Kumpuan Committee duan turin an dah a ni.
Central YMA chuan, tunlai hian Mizoramah ruihhlo a hluar leh tawh hle nia sawiin, ngaihmawhawm an tih thu an sawi a; ruihhlo do turin na taka kal leh ni se, YMA sub-headquarters, group leh branch zawng zawng pawh an huam chhung ṭheuh­ah na taka ruihhlo do tura ngen ni se an ti. YMA-in ruih­hlo a dona turah Mizo mi­puite ṭawiawmna leh ṭawngṭaipuina an ngen a ni.
YMA CEC chuan, March 6, 2015-a Chapchar Kût hman zawh tak an thlir let a, hlawhtling an tih thu leh a hlawhtlin theih nana ṭan latu zawng zawngte chungah lawmthu an sawi a; kum danga Chapchar Kut hman leh turah chuan sorkarin budget-ah sum dah sa tawh se an duh thu an sawi.
Central YMA chuan, Mizo­rama bûkna leh tehna hrang hrang dik lo hluar ta zel tirêm turin Legal Metrology ngen an rel a; BPL leh scholarship-ah dik taka thil tih a nih theih nan a ṭul anga hmalak ṭha a ti. Mizo ṭhalaite tana career guidance zirtirna chak zawka hmalak a nih theih nan School Education leh Higher & Technical Education department-ah thlen an rel bawk.
Excise & Narcotics depart­ment chhinchhiah danin, kum 2000 aṭanga kum 2014 chhung khan ruihhlo chi hrang hrang avangin mi 890 in nunna an chan a, heng zinga 767 chu proxyvon leh parvon spas vanga thi an ni.
Proxyvon leh parvon spas bakah hian heroin vangin mi 69 mi an thi a, a bak zawng mi 54 chu ruihhlo dang alprazolam, cataspa, corazepam, cough syrup, dendrite, diazepam, ganja, nitrosun, peptica, etc. vanga thi an ni. Ruihhlo vanga thi an tam ber kum 2004 chuan mi 143 in nunna an chan a ni.