July 2014 aṭangin nau nei leh ASHA pe thei lo

Aizawl Civil Hos­pital-a nau nei, Janani Surak­sha Yajona (JSY) aṭanga ṭan­puina leh Accredited Social Health Activist (ASHA) volunteer-te'n nau nei an buaipuina chi hrang hrang leh an hnathawhna senso sorkarin a pek tur chu July 2014 aṭangin a pe thei tawh lo. Pawisa pek loh zawng zawng hi Rs. 39,85,200 a ni. Family Planning kalpuinaa nu insiamte tana lawmman pek ṭhin pawh pek theih a ni tawh lo.

JSY aṭanga nu nau neite ṭanpuina hi sorkar damdawi-ina nau nei zawng zawngin an la thei a, in lama neite'n an la thei lo. Lawmman hi Aizawl khawpuia mite tan Rs. 600 a ni a, thingtlang (AMC páwn lam) tan Rs. 700 a ni.

ASHA volunteer-te hnenah nau nei tur an chhinchhiahna te, a rih zawng an bûkna te, damdawi-ina an hruaina man leh an buaipuina chi hrang hranga lawmman atan naute pakhatah Aizawl atan (Aizawla naute) Rs. 400 leh Aizawl páwna mite tan Rs. 600 pek a ni.

Aizawl Civil Hospital (ACH)-a nau nei, sorkarin lawmman a pek theih loh ṭan hun, July 2014 aṭanga February 2015 thleng khan nau nei mi 2,131 an awm. Nu nau nei mi 2,131-te hian Rs. 600 ṭheuh an dawng thei a, an dawn tur belhkhawm chu Rs. 12,78,600 a ni a; mahse sorkarin a la pe thei lo.

July 2014 aṭanga February 2015 inkarah vek Aizawl pawn lam mi nau nei mi 1,229 an awm a; mi pakhatin an dawn tur chu Rs. 700 niin, an dawn tur zat belhkhawm chu Rs. 8,60,300 a ni. Heng thla riat chhunga Aizawl leh Aizawl páwn lama nu nau neite lawmman tur sorkarin a batsak mek chu Rs. 21,38,900 a ni.
ASHA volunteer-te July 2014 aṭanga February 2015 chhunga an hnathawhna lawmman sorkarin a pek tur belh­khawm chu Rs. 1,846,300 a ni a; sorkarin nau nei
ṭanpuina leh ASHA vo­lun­teer-te lawmman tur a batsat zawng zawng chu Rs. 39,85,200 a ni.
ACH-a ni khata nau nei zat hi mi 10-15 vela chawhrual theih a ni a; nuin fa engzat pawh nei se, nau neih ṭanpuina hi an la thei reng a, bithliah chin a awm lo. Chutih rualin, nuin phìr an hrin pawhin, ṭan­puina chu pakhat anga pek tho tur a ni.
Nau neih ṭanpuina pek chhan sawiin, ACH hotute chuan, nau neihnaah thisen tam tak a sêng a, hrisel pangngaia a awm leh theihna tur leh naute enkawl thei tura hma a sawn zelna atana ṭanpuina pek ṭhin a nih thu an sawi.
Family Planning pawh kalpui zel a ni a; nu insiam (tubectomy)-te hnenah lawmman Rs. 600 pek ṭhin a ni. Nu insiamte hnena pawisa an pek theih hnuhnung ber chu May 2014 kha a ni a, June 2014 aṭanga tun thlengin lawmman an pe thei tawh lo.
January 2014 aṭanga January 2015 inkarah nu insiam mi 73 an awm a, indanna (Copper-T) mi 483 hnenah pek a ni a, pakhat Rs. 20 man a ni. Condom a malin 6,058 an sem chhuak tawh a, Oral Pill mi 108 hnenah an pe tawh bawk.
ACH hotute huan, Family Planning lam buaipuite'n thingtlang hmun hla tak tak aṭanga ACH pantute chu ṭan­puina an lo pe hrâm hrâm a, Health department hotute'n pawisa awm thei ang ang an dap khawm a, hmun danga mi pûk cháng pawh an nei tih an sawi