Dan kalha scholarship dil an an tam

Mizoram Scholarship Board (MSB)-a thawkte chuan, scholarship dil thei lo tur dil an tam ṭhin thu an sawi.

Sorkara thiltithei deuh leh dan kalha an fate scholarship dil tírte an lo hnâwl avangin na tak taka ṭawng khumtu an tawng ṭhin a, sorkar hotu lian hnena hêkna pawh an tawn ṭhin thu Vanglaini palai an hrilh.

MSB-a thawkte chuan, dik taka thil kalpui an tum vanga anmahni kutthlak duh hial tura ngaih theih an awm ṭhin avangin mi ṭhenkhat thuràwn angin police-ah venghimtu an lo dil tawh a, phalna pek an ni tawh tih sawiin, mahse tun thlengin police an la ko lo tih an sawi.

Thu dawnnain a sawi danin, scholarship diltute zingah an nu leh pa, sorkar hnathawk, kum khatah Rs. 2,50,000 lalut tih an hriat chian ngeite pawh an tam hle a; an mi hriat chiante ngeiin dik lo taka thil an ti chunga an lo hnâwl vanga na tak taka an nawr ṭhin chu an tan a nuam lo hle tih sawiin, "Document kawltu kan ni a, kan hre chiang si a, sum lakluh zat dik taka diltute hi a zâwldawh zawk an ni fo a, mi neinung leh awm thei zawkte hi a huangtau zawkah an ṭang duh khawp mai," an ti.

Mi ṭhenkhatin post matric tribal scholarship chu tribal zirlai zawng zawngin an dawng thei nia an sawi chungchanga Vanglaini palai zawhna chhangin, MSB hotute chuan, "Tribal nih hrim hrim vanga scholarship hi pek kan ni lo a, tribal kan ni chung hian India ramah kan awm a ni tih entirnan leh kum khata Rs. 2,50,000 la lut lo tan dil theih a ni," an ti.

Kum 2014-15 atana zirlai scholarship lak dan tlangpui chu - Class XI & XII-ah hosteller-in Rs. 5,000 leh day scholar-in Rs. 3,500; degree course (BA, B.Sc., B.Com., etc)-ah day scholar-in Rs. 6,200 leh hosteller-in Rs. 8,900; master degree-ah day scholar-in Rs. 18,800 leh hosteller-in Rs. 21,700; professional/technical course-ah day scholar-in Rs. 20,500 leh hosteller-in Rs. 27,000-te a ni.