CYMA President-in ruihhlo an dona turah mipuite ṭawimawmna a ngen

Central YMA president Lalbiakzuala chuan YMA in ruihhlo do beihpui an thlak lehna turah Mizo mipuite ṭawimawmna a ngen.

Vanglaini palai zawhna chhangin Lalbiakzuala chuan tunlaiin Mizoramah ruihhlo a hluar nasa tih sawiin, "Hmun hrang hrangah ruihhlo hi a hluar hle a, theihtawp chhuaha do leh tura YMA ngennate, ruihhlo chungchanga YMA hmalakna duhkhawp lohnate a awm a ni. Chuvangin, kan chawl rei ta bawk a, tha in thawh thar leh teh ang, kan ti a ni," a ti a, fimkhur takin, hmingchhiatna awm thei lakate fihlim thei tura an kal tur thu a sawi.

Ruihhlo do turin YMA-in pawisa neih sa a neih loh thu sawiin Lalbiakzuala chuan, "Ti hian kan han kal chho tawp ang a, Mipuite ṭawimawmna kan ngai hle a ni," a ti a, Mizo mipuite chu fimkhur tak leh ṭha taka an kal theihna atan ṭawngṭaipui turin a sawm.