Serchhipah World Consumer Rights Day hman a ni

Serchhip District Consumer Association huaihawtin Inrinni zing dar 7:00 khan Serchhip Ba­zar­ah 'World Consumer Rights Day' hman a ni a, Serchhip IPRO Andrew H Lalremruata khuallian a ni.

Andrew H Lalrem­ruata chuan, Serchhip District Consumer Association chu mipuite tana ding leh mipuite hamṭhatna leh dikna tarlansaktu an nih avangin an pawimawh hle tih a sawi a, chhawr ṭangkai tur leh sumdawngte'n dik lo taka thil an tihte laka inveng turin mipuite a chah. SDCA president H Zonuntluanga pawhin, SDCA chu mipuite'n harsatna an tâwk a nih chuan ṭanpui turin an inpeih reng thu a sawi.

World Consumer Rights Day March 15 a ni a, Pathianni a nih avangin Serchhipah hian Inrinni khan an hmang a; kumina thupui chu 'Healthy diets' tih a ni.