Aizawl khawpuiah CCTV vuah ṭan a ni

Mizoram sorkara Home department chuan Aizawl City Surveillance Project hnuaiah Aizawl khawpui chhung venhimna atan closed-circuit television (CCTV) a vuah ṭan ta a, Inrinni khan hmun ṭhenkhatah vuah ṭan a ni.

CCTV vuah tur hi Phase I leh II-ah ṭhen a ni a, Phase I-ah chuan Aizawl khawpui chhung hmun 10-ah CCTV vuah a ni ang a, camera 61 vuah tum a ni a, Aizawl SP office-ah Control Room a awm ang. Phase-I chu a ṭha tâwka ngaih a nih chuan Phase-II chhunzawm a ni ang.

CCTV vuahna hmun pakhatah hian invéng tawn thei turin IP camera pakhat aia tam vuah tur a ni a, Phase II-ah chuan Aizawl khawpui hmun 23-ah CCTV vuah leh tura ruahman a ni.

Aizawl City Surveillance Project kalpui tur hian January 10, 2014-ah Home department, chief secretary leh KSJ Dynamic Security Pvt. Ltd. New Delhi ten inremna an ziak tawh a; project pumpui atana sum ruahman chu Rs. 12,64,89,500 a ni.

KSJ Dynamic Security project manager Billy Lalmuanpuia chuan, CCTV atan hian camera ṭha ber chi, IP camera, DV Tel company siam an hmang dawn tih a lo sawi tawh a ni. Camera vuahte chu zan thimah pawh colour vekin thla a la thei niin an sawi.

CCTV enkawl tur hian police force hrang hrang - MRP, CID, MPRO, Traffic leh Security aṭangin mi 20 chu training pek tawh an ni.