Chhungkaw 6 luah lai in 2 a kâng

Nimin zing dar 9:30 vel khan Kulikawna Hmuntharah Assam type in pahnih, chhungkaw paruk luah lai a kâng ral a, mihring thi an awm lo.

Kulikawn YMA hruai­­tute aṭanga thu dawn danin, kângmei hi Rallianchhawni in chhawng hnuai lama Lal­biaksanga luah aṭanga kâng ṭan a ni a, mahse Lalbiaksanga in kan ṭan laiin a awm lo a, Pathianni zanah pawh inah a riak lo.

In chhawng chung zawk luahtu Hnuni chu kângmei hlaua a tlan­chhuah hnuah kawng­puiah nikhaw hre loin a tlu a, damdawi-in panpui a ni.

Kângmei hian Ral­lianchhawni in bul chiaha K Laldinthara in, Assam type, chhungkaw pali luah lai pawh manin, a kâng ral a; bungrua erawh tlem azawng an thehchhuak hman. Assam type in pahnih sir tawn tawnah RCC building, Zosanga in leh H Kaphlira in a awm a, tlem azawng kang ve mah se, an vêng thei a ni.

Kângmei chhuahna hmun hi bialtu MLA Lt.Col. ZS Zuala'n tlawhin, ṭanpuina Rs. 5,000 leh rangva bundle 12 a pe a; minister PC Lalthanliana leh C Ngunlianchunga ten pawisa an pek bakah, bialtu councillor Ram­hlun­sanga'n AMC aṭang­in Rs. 10,000 a pe a, MPC president Lalhmangaiha Sailo-in hnatlangte thingpui inna senso atan Rs. 2,000 a pe bawk.

Kulikawn YMA hruaitute chuan in kâng hi nimin khan hnatlangin an senghawi a, vawiinah hnatlangin an sak ṭhatsak dawn thu leh, nimin tlai khan an veng chhungah ṭanpuina an khawn thu an sawi.