Thuneitute'n kawng sira truck 42 an man

Aizawl Municipal Council leh Aizawl Traffic police ṭangkawp chuan nimin khan Rangvamual leh Ṭhuampuia AMC office inkar kawngpui sira truck ding an enfiah a, truck 42 an man.

AMC leh Traffic police-te hian truck an man zinga 12 chu an manna hmunah pawisa an chawitir a, truck khalhtu pali chu an driving licence laksakin, office-a in report turin an ti a; truck 31 chu a khalhtu leh handyman an awm loh avangin man an ni tih chhinchhiahna lehkha an tár a, in report tura tih an ni.

Traffic SP Lallianmawia chuan, Rangvamualah sorkarin Ch. Saprawnga Truck terminus a ruahman tawh avangin, chhunah Aizawlah truck din khap a ni tih sawi.

Phal lohna hmuna lirthei dah an awm leh awm loh an endik zel dawn tih sawiin, Lallianmawia chuan, "MZ-01 F-7188 hnu lama ziah luh motor zawng zawng chu garage neia insawi vek an nih avangin sorkarin kawng sira dah lo a, garage-a dah vek tura tih an ni," a ti.