Mizoram sikulah zirlai 3,12,637 an awm

School Education department leh SCERT officer-te chu nimin khan School Education secretary Arun Goel hoin Secretariat confe­rence hall-ah department pahnih hnathawh chi hrang hrang an sawiho. Meeting-ah hian Mizoramah primary school aṭanga higher secondary school-ah zirlai 3,12,637 an awm thu tarlan a ni.

Meeting-a tarlan danin, Mizo­rama primary school leh higher secondary school zirlai 3,12,637 zinga 1,76,453 chu sorkar sikula kal an ni a, zirlai 1,36,184 chu private sikula kal an ni thung.

Kum 2014-15 chhungin midday meal atan sorkar laipui aṭangin cheng nuai 2,049.78 hmuh tawh a ni a, Mizoram sorkar aṭangin cheng nuai 683.21 hmuh tawh a ni. Kum 2015-16 chhung atan Project Approval Board chuan midday meal dawng turin primary-ah zirlai 98,825 leh middle school-ah zirlai 46,550 a pawm tawh bawk.

RMSA hnuaiah sorkar kum kal mekah sorkar laipui aṭangin cheng nuai 1705.10 leh Mizoram sorkar aṭangin cheng nuai 64.10 hmuh a ni tawh a; SSA hnuaiah sorkar laipui aṭangin cheng nuai 13,180.897 leh Mizoram sorkar atangin cheng nuai 1,218.25 a dawn a ni tawh bawk.