KHAWTHLIR

Thisen pe
March 14, 2015 khan Bawngkawn Bial KṬP Central KṬP Blood Donation Calendar angin Aizawl Civil Hospital-ah thisen unit 87 an pe a, a petute mipa 66 leh hmeichhia 21 an ni. Sialsuk Bial KṬP pawhin Inrinni khan Synod Hospital-ah thisen unit 66 an pe a, a petute mipa 60 leh hmeichhia paruk an ni. Inrinni vek khan Champhai Kahrawt Bial KṬP-in Champhai District Hospital-ah thisen unit 30 an pe a, a petute mipa 18 leh hmeichhia 12 an ni.

Apex Bank leh gas
Apex Bank chuan NPCI Certification neiin eirawngbawlna gas subsidy chungchanga DBTL chu an customer-te tana hman theihin an peih fel ta a, gas subsidy thila harsatna nei chuan mahni account neihna branch-ah zawhfiah tur a ni.

Zu zuar tan
Mizoram Liquor (Prohibition and Control) Act hnuaiah nimin khan Aizawlah zu zawrh ṭan a ni a, hmun danga a remchan loh avangin Millennium Centre-ah chiah zu hralh a ni.

Kawng khâr dawn
Vawiin chhun dar 11 aṭanga 12:30 inkarah Kawnpui daia Sairang peng leh Zanlawn inkarah lirthei reng reng tlan phal a ni dawn lo. Kawngpui khâr chhan tur chu - ONGC-te'n Zanlawn khuaa hna an thawhna tur khawl phurtu motor lian a kal dawn vang a ni.

Ar 700 kâng
Nimin chawhnu khan Falkland Venga Manthianga, Zemabawk ar vulhna in a kâng a, ár 700 a kâng hlum. Ar-in kâng hi a hmu hmasatute'n theihtawp chhuahin an ṭhelh a, mahse an ṭhelhmit thei loa, ar-in ruak erawh a kan nasat hmain an ṭhelh hman a ni.

Heroin man
Excise & Narcotics department chuan nimin khan Chanmari West, Hunthar road-ah Vanlalchhungi (36) d/o Lalbiakliana, Zuangtui veng nia insawi hnen aṭangin heroin gram 21 an man.