Vawiinah Assembly Session ṭan dawn

Mizoram Assembly pasarihna session vawi ngana chu vawiin chawhma dar 10:30 hian ṭan a ni dawn a, March 25, 2015 thleng a awh ang.

Assembly Secretariat aṭanga thu dawn danin, vawiina Assembly session ṭan a nih veleh Governor Dr Aziz Qureshi chuan thu a sawi dawn a; a thusawia lawmthu sawina motion put luh nghal a ni ang.

Tun ṭum session atan hian bill pali a lut tawh a; chungte chu - The Mizoram Municipalities (Second Amendment) Bill 2015, The Mizoram Youth Commission (Amendment) Bill 2015, The Mizoram Right to Public Services Bill 2015 leh, The Mizoram Compulsory Registration of Marriages (Amendment) Bill 2015-te a ni.

House-a ṭawngkaa chhan chi zawhna (starred question) 125 leh ziaka chhan chi (unstarred question) 22 a lut a; MLA pasarih aṭangin private member resolution 35 a lut bawk.

March 19-ah Finance minister Lalsawta'n sorkar kum thara April-July 2015 chhunga hman tur sum ruahman Vote-on-Account leh sorkar kum kal lai 2014-15 atana pawisa dil belhna Supplementary Demand-te a pharh ang.